陳子聰康復上舞台 何超儀負傷撐場

  陳子聰前年大動脈撕裂，接受漫長治療及多次手術，又獲太太何超儀悉心照料，康復情況理想，前晚（3日）重返其殿堂級Hip Hop組合「廿四味」，在西九參演的大型馬拉松式本土搖滾音樂節《The Wild Ones Music Festival》，他坦言經歷過這次事件，好感恩生命，感受到途人很多愛。負傷撐場的何超儀冧讚老公表現100分，更笑指公老靚仔因有她緊張照顧。

久未露面的子聰精神不俗，興奮落力表演，不時除下黑超看現場觀眾，但感覺動作較緩慢，咬字不清晰及不夠氣，他唱完後大叫：「I love Hong Kong！多謝大家支持。」
死過翻生感恩生命
受訪時，已3、4年沒上台演出的子聰開心表示感謝，又坦言少少緊張。廿四味成員對子聰歸隊，開心到爆粗說：「開心到X街！睇到佢行到街，可以一齊食飯已經開心到X街，跟住佢同我哋講話一齊上台，真係好驚喜。」子聰笑言行得食得瞓得後已想做騷，希望日後多作演出，問到見到隊友在台上飲啤酒是否心郁？子聰說：「我2016到現時都冇飲過酒，已經飲夠喇嗰陣，現時食得好清淡，經歷過嗰啲階段，好感恩生命。」並指這晚上台表演，太太何超儀最開心「lucky to be here」。並指在街上獲不少人祝福身體健康，行街已感受到愛，透露還有手術要做，隊友笑指他「點都咁靚仔」好乞人憎。問到下月是否去美國關閉手術造口？子聰笑問：「我老婆講㗎？」
感激陌生人送祝福
問到覺得子聰表現如何？何超儀大讚：「佢表現好好，身體好過我。（畀幾多分？）我畀100分！」她冧爆讚老公好有型，並指香港人給他好多祝福，「街上有好多人送祝福，我哋好鍾意大家嘅祝福，因為冇得同個天鬥，個天應該睇住咁多人送祝福嘅份上會覺得『好啦，唔好整蠱佢』。」
子聰獲隊友讚靚仔，問何超儀是否因有她悉心照料？她笑言：「冇錯，我緊張佢，佢咪咁靚仔囉。」她又透露子聰每星期做四次物理治療，體能很好，而她的腳傷約六個星期後康復。