過百「神徒」冒雨守候 Anson Lo擔遮派心心

「教主」Anson Lo（盧瀚霆）昨日接受商台節目《叱咤樂壇》直播訪問，過百「神徒」（粉絲暱稱）到場，但他中午12時許坐七人車直駛入商台，全車拉窗簾，神徒未能見到本尊。直至約下午四時半，教主由商台後門離開，見有大批神徒冒雨等候，於是他撐傘走近欄杆跟大家講：「落緊雨，快啲返去啦！」上車前聽見有神徒大叫「畀心心」，教主二話不說即向大家派心心，引神徒興奮大叫。當座駕駛離時，大批神徒湧出馬路，險象環生。
教主在節目中談及新歌《ON》製作點滴，又透露去年獲隊友Jeremy推介做冥想，最近才開始嘗試，每次冥想約廿分鐘。而直播時有人留言問他會否推出演唱會DVD？教主透露聽聞製作中，但未必出，笑言可能性高、但要等，亦未聽聞有個人海外巡唱，但認為MIRROR巡唱更有可能。