稱要將街頭抗爭精神帶入立會選舉 何桂藍自認「抗爭者」

（星島日報報道）民主派47人參與「35+」初選案續審。被告何桂藍昨於西九龍法院承認自己大概於2020年6月起，會視自己為「抗爭派」。法官李運騰問及何桂藍視自己為抗爭派的原因。何認為「抗爭派」是因應2020年立法會選舉而出現的一個派系，她符合抗爭派的4種特徵。包括要承認2020年立法會是不能做到落實政策倡議的功能；不會以避免DQ或保住議席為首要考慮；另入到立會每一條草案，都要用盡《基本法》賦予的職能去審議，以及自行決定是否與政府談判。
何桂藍表示，參與初選是希望可以推進反修例運動，將街頭抗爭的精神帶入立法會選舉。何稱，「2019年場運動有好多唔同嘅精神，包括爭奪定義『攬炒』主導、一息尚存抗爭到底等」。法官陳慶偉着何逐一解釋，何回應指，第一是有一個身分去演繹「攬炒」的定義；第二是社運「無領袖、去中心化的狀態」；第三是去找最合適的角色身分貢獻運動；第四是調和「兄弟爬山」、「和勇不分」等概念引申出來的矛盾。
指議員無法左右財案

何桂藍直言早於2011年任職記者跟進立法會新聞時，「已經覺得財政預算案要否決㗎喇」，解釋「問題唔喺條實數度，係財政預算案點樣draft出來、點樣計出來，年年都係差唔多嘅⋯⋯因為喺立法會入面，就算你攞到70席，你都唔可以幫公共醫療系統加一個鏰。每年財政預算案大概5000至6000億，我而家就可以話畀你聽，下一年又會有1000億喺基本工程儲備基金入面」。

何桂藍強調即使「五大訴求」得到回應或沒有「35+」，只要她不滿預算案的制定及審核制度，她都一定會否決預算案。何又稱，「而政府會將啲唔受歡迎工程，化整為零，化成前期工程、基本工程，全部擺晒入基本工程儲備基金，然後用其他9000幾項無爭議嘅工程，逼立法會一定要通過佢，我形容呢一個係財政黑洞，公共財政黑洞」。
不滿陳茂波動用未來基金

何桂藍續指，「因為當我發現連建制派要求派錢，但係曾俊華堅持要投落MPF（強積金）嘅時候，明明建制派攞住大多數，佢哋當年除咗否決臨時撥款議案同施壓之外，乜都做唔到⋯⋯立法會議員只可以攞一個總目入面嘅細項入面去減錢，唔可以加錢，唔可以加items，亦都唔可以改變嗰年財政開支嘅方向」。

《香港國安法》指定法官陳慶偉問，如2020年政府提出財案時依樣葫蘆，何桂藍是否會否決？何桂藍指，「2020年正正就係陳茂波開始動用未來基金嘅一年⋯⋯呢3000億政府本身2016年成立未來基金嘅時候，講明10年唔可以郁，同埋如果郁要經立法會批准。但係2020年開始，陳茂波就不斷喺入面攞錢繞過立法會，一開始係注資國泰，然後話搞北部都會區，而家話搞香港淡馬錫。我必須要指出，嗰度每一分都係納稅人嘅錢，但係納稅人喺呢個制度之下，係完全阻止唔到佢哋嘅行為」。案件編號：HCCC69/2022