經典之光走勢急勁

雖然昨晨天氣不好，期間更一度落大雨，但出跳馬依然此起彼落，當中好多勇馬。現將所見報道如下： 
「馬林」韋達拍「南征北戰」助手跳兩段，前駒戴頭罩，情緒有改善唔再扭計，大隻馬亦愈見輕身，後駒戴眼罩，同樣大大隻但論盡好多，出腳欠順暢，狀態未得。 

「大勢至富」戴頭罩由助手跳兩段，未見搶口神情專注，落腳爽勁，狀態早在勇境。

「亞洲力量」戴頭罩由助手跳兩段，精神爽利充滿朝氣，馬身保持壯健持續勇銳。 

「綠色有料」蔡明紹跳一段，慢速完成無轉腳，走來唔再急好淡定，論馬大有進展。

「加非凡」戴頭罩由助手跳兩段，愈見規矩唔再扭頭擰髻，神采奕奕，狀態在不斷進步中。 

「風繼續吹」戴眼罩由助手跳兩段，擔高頭走極之神氣，步幅好大且勁度又夠，狀態大勇。

「敏捷神駒」戴頭罩由助手跳兩段，出腳夠勁朝氣旺盛，馬身收得更靚，狀態有進無退。 

「經典之光」戴頭罩由蔡明紹跳一段，試來比上課爽得多，有番活躍感，走勢急勁，狀態大勇。

「中華叻叻」戴頭罩由蔡明紹拍「高氣派」跳兩段，好遲轉腳更有點論盡，更弊是拍住質新馬也有力不從心的感覺，狀態未得。 

「高韻」戴眼罩由助手跳一段，步伐穩健力度不斷增強，馬身收得靚，觀感不俗。 

「爽快」戴頭罩由助手跳兩段，昂首闊步神態威武，勁力十足，狀態比前再進一步。 
知足常樂外觀省鏡

「知足常樂」戴頭罩由布文跳兩段，神閒氣定唔急唔搶，仲要馬身比前更粗壯，外觀夠晒省鏡。 

「醒臣」戴頭罩由助手拍「你知我拼」跳兩段，重口毛病早已改善，拍住順走神態對辦。 

「日日獎」布文、「直線力山」何澤堯拍「皇者驕傲」草閘跳兩段，「日日獎」拍住「皇者驕傲」一齊走表現稱職，唔急唔搶情緒好，馬身又收得靚，「直線力山」出閘順利，但之後唔肯走，跟手走順番又無問題，論態則好理想。 

「信心之選」戴頭罩由助手草地跳兩段，躍躍欲試火猛搶走，皮光肉滑外觀又省鏡。

「滿歡笑」布文拍「驍勇者」、「龍之威」草閘跳兩段，末段自動追上火猛力勁，強如布文都拉佢唔住。