Eason騷前險失聲 啪藥救急 台上泣不成聲歎羞家

（星島日報報道）陳奕迅（Eason）紅館演唱會前晚（10日）舉行第24場，Eason在綵排時發現聲音出現少許問題，好擔心會失聲，幸好演出成功。在安歌部分，他選唱《相信你的人》，因歌詞而感觸，令入行27年的Eason第一次在觀眾面前落淚。
Eason表示︰ 「呢兩日不知天氣定咩，有啲嘢發咗出嚟，我突然好驚自己冇聲，當然我哋有現代科技幫忙，我冇去打針呀，因為好傷呀，我食咗粒藥囉。我又怪責自己，加乜嘢場，做25場咪好囉，自己戇居、覺得一路都好好，我又27號生日，咁27場幾好喎，下午回來綵排時，沉過𠵱家一千倍，嚇親所有工作人員，其實係我太緊張，自己同自己比較，不想令大家失望！」
自嘲失禮
安歌環節，Eason揀了近年他好喜歡的《相信你的人》，他解釋：「呢隻歌係我2019年為電影《銀河補習班》而唱，鄧超導演帶埋部未完成的電影，飛來香港俾我睇，問我有冇興趣唱隻歌。佢最初想用《單車》改國語版，但我覺《單車》唔適合變國語版，最後我搵咗台灣一位我好尊重嘅好朋友寫詞、作曲。唔知係人年紀大易感觸定點，歌詞真係好令人動容。」接着Eason突然泣不成聲謂：「二十多年來，我從來唔會俾呢個樣大家睇，唉，羞家失禮，我通常剩係帶歡樂同憤怒俾大家，我冇哀愁，哀愁喺晒歌裏面，亦唔想喊，喊緊點唱歌俾大家聽，呢兩、三年每當我唔開心、迷惘時，呢隻歌俾咗好多力量我，所以我特登揀來送俾大家，請大家相信：勇氣就係魔術，可以幫到你。」
此外，這兩晚捧場支持Eason的群星如雲湧現，包括甄子丹夫婦、吳君如一家三口、陳法蓉、張智霖、岑寧兒、溫碧霞及老公、洪卓立及女友劉沛蘅等。