Eason骚前险失声 啪药救急 台上泣不成声叹羞家

（星岛日报报道）陈奕迅（Eason）红馆演唱会前晚（10日）举行第24场，Eason在彩排时发现声音出现少许问题，好担心会失声，幸好演出成功。在安歌部分，他选唱《相信你的人》，因歌词而感触，令入行27年的Eason第一次在观众面前落泪。
Eason表示︰ 「呢两日不知天气定咩，有啲嘢发咗出嚟，我突然好惊自己冇声，当然我哋有现代科技帮忙，我冇去打针呀，因为好伤呀，我食咗粒药罗。我又怪责自己，加乜嘢场，做25场咪好罗，自己戆居、觉得一路都好好，我又27号生日，咁27场几好喎，下午回来彩排时，沉过𠵱家一千倍，吓亲所有工作人员，其实系我太紧张，自己同自己比较，不想令大家失望！」
自嘲失礼
安歌环节，Eason拣了近年他好喜欢的《相信你的人》，他解释：「呢只歌系我2019年为电影《银河补习班》而唱，邓超导演带埋部未完成的电影，飞来香港俾我睇，问我有冇兴趣唱只歌。佢最初想用《单车》改国语版，但我觉《单车》唔适合变国语版，最后我搵咗台湾一位我好尊重嘅好朋友写词、作曲。唔知系人年纪大易感触定点，歌词真系好令人动容。」接着Eason突然泣不成声谓：「二十多年来，我从来唔会俾呢个样大家睇，唉，羞家失礼，我通常剩系带欢乐同愤怒俾大家，我冇哀愁，哀愁喺晒歌里面，亦唔想喊，喊紧点唱歌俾大家听，呢两、三年每当我唔开心、迷惘时，呢只歌俾咗好多力量我，所以我特登拣来送俾大家，请大家相信：勇气就系魔术，可以帮到你。」
此外，这两晚捧场支持Eason的群星如云涌现，包括甄子丹夫妇、吴君如一家三口、陈法蓉、张智霖、岑宁儿、温碧霞及老公、洪卓立及女友刘沛蘅等。