吳浩康郭思琳註冊喊唔停

(星島日報報道)吳浩康（Deep）與郭思琳修成正果，早前宣布結婚兼快將升呢做父母，一對新人昨日舉行小型婚禮正式註冊。Deep緊張到前兩晚已失眠，一早綵排時已忍不住喊，在註冊一刻更與太太哭不停，對於BB性別，Deep表示要保持神秘，但透露視為「半個爸爸」的老闆楊受成會送大利是給BB。
婚禮少不了「愛的宣言」，Deep笑言已度了很多晚，多謝太太願意嫁給他、願意一齊去經歷他們的人生、一齊去遮風擋雨。郭思琳也表示：「佢同我結婚已經係一個承諾嚟㗎啦，所以佢唔使講我已經收到晒。」Deep大讚老婆性格率直、簡單有孝心。問到給太太幾多分？他笑言剛學會新婚第一課，「畀太太幾多分都唔夠喎，唔可以亂咁畀分，呢個係我啱啱新婚學識嘅事，所以太太一定係超過滿分。」Deep坦言婚後心態亦要再重新調整。至於郭思琳婚後第一課，她笑說要「見識」婚姻的恐怖，有太多要去學習，暫時覺得相處是大前提，都想快些經歷有幾恐怖。
執樹枝完成裝飾
二人準備婚禮期間亦發生不少「蝦碌」事，Deep謂：「過程雖然好簡單，但係蝦碌嘢都多，因為而家啲速遞、運輸都受到影響，所以我哋訂咗好多裝飾嘅嘢好多都冇嚟，最後我哋係喺山邊執樹枝，去完成個裝飾。」在疫情期間舉行婚禮亦未能邀太多親友，Deep表示一定會補辦婚宴。Deep坦言無論疫情與否，都是最難忘，「因為冇經驗，蝦碌百出，感謝太太嘅包容，雖然冇一個十全十美嘅婚禮，但亦都係疫情見證下嘅一個完美婚禮。」
正式註冊時，Deep跟郭思琳喊不停，Deep謂：「註冊好緊張，冇諗過咁緊張，都好多感動，特別係我見到自己爸爸喺度，其實我都冇乜點停過喊。」郭思琳見Deep喊到「決堤」亦忍不住：「我冇諗過會喊得咁犀利，我一見到佢喊我又忍唔住喊，佢太眼淺啦，我成日要安撫佢。」
保密BB性別
除了成為「人夫」，Deep亦快將成為爸爸，問到首胎是仔定女？Deep表示要保持神秘感暫不透露，但仔女都鍾意，「其實仔定女都會好鍾意，因為自己都好期待。現時我哋兩個都係專注喺第一個小朋友度先，因為都係第一次做爸爸媽媽，所以有好多嘢都未知，可能好多情況要兼顧，所以我哋嘅焦點都係喺BB度先。」Deep透露老闆楊受成會送大利是給BB，「老闆楊生話會封大利是畀我個BB，其實收到老闆嘅祝福已經好開心啦，因為老闆真係睇住我成長，照顧咗我二十年，都係我半個爸爸，所以有自己咁尊敬嘅人嘅祝福，其實已經係好大嘅禮物。」