克勤收一日人工做足七日

（星島日報報道）無線真人騷節目《聲夢傳奇》舉行排練探班，主理人李克勤提到過程好玩，自己願教學員又願學。他特別提到很久沒見過台前幕後齊心做好一件事，他笑說：「我收嘅人工係每個禮拜做一日嘢，依家幾乎日日都會開會，所有人都係全天候。」他坦言大家都未知道收視跟口碑會否似預期，但士氣非常好。

克勤提到某幾個學員的確稍為遜色，但有趣的是，到了正式踏台時有好表現。他更以足球員來作比喻，笑說：「有啲係大賽球員，大賽先有好表現。有啲平時也文也武，但一到大賽就隱形。」他又大讚學員抗壓能力非常高，還憶起以前新人站台是真的會驚到腳震。

此外，周柏豪在節目中擔任導師，他坦言自己都是邊教邊學，視為自己的補習班：「有啲嘢以前學唱歌時學過，但有時做做吓忘記咗。」問到他有甚麼心得可傳授？他說：「例如點企會好睇啲、心理質素、咬字等等。（心理質素係強項？）都唔係，唔可以話自己最強項。但可以分享一下，喺呢行可以清楚自己多啲。」

問到最欣賞哪位學員，周柏豪表示是最年輕的姚焯菲，他說：「我屋企啲小朋友都係10幾歲，但仲係BB咁，但佢好犀利。如果佢10年後仲喺度，我覺得佢有潛質有更大嘅進步。」談到男學員，他笑說：「有啲仲有信心過我，唱歌運用技巧方面仲純熟過我。」

另外，姚焯菲感激周柏豪的欣賞，更指對方是一個很好的導師。提到上一集表現失準分數最低而爆喊，她自認眼淺，兒時會因遺失工作紙而爆喊，而現在已經有改善。她笑笑說：「返到屋企睇番，都覺得真係唱得好差。（9分畀多咗？）我覺得係。」而詹天文就獲得最高分24分，她坦言感到壓力，因往後低過24分就是退步。