「怪獸厨神」唞夠搏殺

雖然「金鎗六十」驚險勝出董事盃，但能克服不利慢步速，並且在末段馬鞍滑移下，贏得險不用介意。不過之後能否再締佳績成為疑問！事關為了一千萬特別獎金，幕後有意讓進軍二千香港金盃和二千四百米遮打盃，究竟「金鎗六十」有否足夠氣量，還看呂健威的功力了。

第五場第四班一〇〇〇米：今仗參戰馬只得「怪獸厨神」和「爪皇轟天」在季內贏過，後駒更贏夠兩W，但實力有幾高相信大家好清楚，七歲馬亦不會有進步，相對「怪獸厨神」四歲馬年輕力壯，自然可博得多。雖然之前已經贏過，實則「怪獸厨神」當戰仲係好生硬，轉彎外閃，入直路衝刺側側身，能贏全憑質素搭夠。接戰此駒包尾大敗而回，一千好開之馬突然安排增程部署不當。上仗「怪獸厨神」當跑番同程，全程三疊又無遮檔，唔大敗已可收貨，相對輸唔遠喜出望外。何良不讓「怪獸厨神」跑兩周前同班同程，全為唞夠儲火搏今戰，再看早前做埋大閘，上周拍跳推騎反應好，現已準備就緒。

第七場第三班一〇〇〇米：上仗對「精靈勇士」有點戒心，因為馬兒在上年五月做過骨裂手術，擔心腳患會復發，加上之前口勁仍好重，分分鐘因檔好跟得急，出現大半程搶口情況。

事實上「精靈勇士」腳傷無事，亦無搶口沿途走勢規矩，跟守黃金包廂位，一入直路加速逢馬過馬，而跑出五十六秒六八，更係本季同程第三快時間，第一及第二快均由廄侶「帖木兒」保持，該駒跟手再於三級賽封王。由此可知，「精靈勇士」仍在三班出戰極之着數，尤其今次幾匹主要對手，一而再出戰同程未能造出好時間，而「精靈勇士」近期繼續操得並有快跳，好幾課踱步更搶走火氣旺盛，狀態弗到震。