李辰安 - 時興虛擬資產 高回報有冇伏？｜辰來之筆

 

咁就20年

金融產品日新月異。

虛擬金融高回報有冇伏？

我行走中環話咁快已20年。

回想在這裏講第一個故事就係MBA。

今次要同大家講拜拜，後會有期。

講開又講，在中環好快經過20年，今次要同大家講拜拜，後會有期，回想在這裏講第一個故事，不知大家有否記憶？

大師兄講：「安仔，你得閒都可以過嚟吹下水，唔係去移民？」如果我話去珠江新城返工，你又點睇？張翁話，廣州可以坐高鐵，話咁快就可以愛回家，所以唔使太過在意。不過，都係銀行偉最有心，佢話，你同我哋幾個酒友吹水，第一個故事係勸大家及時行樂，所以大家先至周五酒聚，唔好畀工作拖累。

大師兄話有印象，「你係講MBA的故事嘛！」好啦，首先大家飲杯先，第一樣要祝張翁無買虛擬資產，並且成功過到美人關。大家即時起哄，事關話題太熱了，人在中環，周不時會遇到靚女投資顧問，如果大家投緣，可以上去Office了解一下，張翁就撞到正。「係，有位朋友個朋友個女，英國名牌大學畢業，喺中環某高級寫字樓之金融公司返工，佢問我，有無興趣玩下虛擬金融，每年10厘回報起錶，20厘可期。」

虛擬金融高回報有冇伏？

一聽就知有故事啦，「世侄，我行走中環半個世紀，有乜未見過？」你講係咪咩靚女未見過？當然，我無講出聲而係好似好有耐心聽佢講故事。係咯，今日不如開支靚紅酒，反正今次一聚，唔知幾時咁齊人，所以叫靚仔侍應碧咸仔，幫我哋揀支好嘢。「係噃，每年20厘回報，聽到都可以報案啦，張翁，咁你點回應？」其實，無論你係咪老江湖，抑或大學生，只要有貪念，隨時中招啦，金融產品日新月異，我望下銀行偉有乜反應，點知佢好淡定歎緊紅酒，無表情。

「我同靚女講，投資幾多呀，佢話先開個一千萬元戶口熟習下，一億元就最好。」我幾乎畀杯酒嗆到！張翁話，大家都算有少少朋友關係，我又唔好意思令人難做，「我有十萬八萬閒錢，都可以試下。」銀行偉即時笑笑口︰「張翁，靚女分分鐘上落幾百萬，你老人家唔好阻人時間啦。」

紅酒有木香味，好似好嘢咁，幾抵飲，係啦，靚女點答你？「佢話，咁呀，不如你留嚟抽銀髮債券啦，抽到有3厘幾4厘息。」我再一次幾乎畀紅酒嗆到，好啦，都係講我喺呢度吹水講嘅第一個故事。

話說，有位學霸女孩，從小都係AAA。「咦，辰哥，你想講邊個邊個？」唔係邊個邊個，你聽我講埋先啦。AAA女孩揮低幾千個競爭對手，榮獲城中獎學金，到美國名牌大學讀MBA。「我想補充，故事發生上世紀60年代，就算有獎學金，亦要低調生活，事關去美國生活成本好貴。」

AAA女孩畢業之後想進修博士課程。不過，導師建議她休息一下，原因讀書讀到太有精神壓力，所以勸她唔好太搏命，醫生開解AAA女孩，佢話佢有一位女同學，大學畢業之後，努力要實現佢嘅夢想，就係坐郵船環遊歐洲，呢一個係好浪漫、好勵志嘅想法，當然，更是昂貴玩意。那位女同學工作幾年，先至儲蓄一筆錢買船票，她手上所餘不多，但為了夢想，她還是決定起程。

大師兄話︰「我記得啦，女同學全程在郵船食罐頭同麵包，唔敢行出去同班後生朋友開Party，吃喝玩樂，原因怕無錢埋單。」係囉，原來完成整個旅程，落船嗰一刻，先至知道郵船吃喝玩樂係船飛包埋！好啦，大家都知道故事教訓我哋乜嘢，最緊要開心，活在當下，今日有緣相聚，飲多杯，希望大家都活得開開心心，做人唔好勒住勒住，再見！

 

立即成為《星島頭條》App會員，即有機會贏走免費香港迪士尼樂園門票！https://bit.ly/46oBNJr

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ