李辰安 - 城市錯覺｜辰來之筆

打風唔成三日雨，打得成風原來仲大件事，香港，原來會水浸，我以為係集體記憶。

林村河黑雨下，途人發現有人在河中隨水漂流。

黑雨下，黃大仙處處水浸。

有渠務工人在高度及膝的黃泥水中，找到地面的渠蓋將它打開。

鰂魚涌街成澤國嚴重水浸，多輛汽車被困水中。

觀塘翠屏道水淹巴士站，巴士涉水載客。

講明500年一遇 到處大水

大師兄首先講：「安仔，你唔好亂噏，你不如話可以申請非主流文化遺產項目，講明500年一遇，火星都浸。」是日好天，無雨落，開始有陣陣涼風，大家話，不如試下港鐵站商場間重慶火鍋，不過，都要飲杯先啦。講開又講，唔知是否我的童年回憶太過深刻，好似上個世紀90年代，都再無見過上環海味街水浸，一過幾十年，以為最多係新界嗰邊先至有魚塘水浸，後來魚塘都變咗商場，從此我就再無見到電視台訪問水浸入舖頭嘅老闆吐苦水。

「世侄，上次天鴿、山竹兩大颱風吹到，香港大街小巷都好似公眾泳池咁，乜你嗰陣時去咗火星咩。」講呢啲，不如開支紅酒熱下身先。我其實話，因為當年最嚴重係澳門、珠海，所以搶走我嘅記憶空間，香港真係好少水浸。銀行偉話︰「辰哥，你可能係網上思覺失調，嗱，大家飲杯，我再慢慢同大家分享。」我望住佢，心諗你先至思覺失調，九唔搭八。

「係，你可以話唔係思覺失調，而係曼德拉效應。」張翁伸一伸懶腰，呢啲咁玄咁飄之話題好似唔合佢口味，於是行開去搵靚仔酒保碧咸仔講下中國足球前途，我就同大師兄繼續聽銀行偉喺度思覺失調。

「即係咁，同曼德拉效應，呢種所謂城市集體錯覺原理一樣，之不過，今時今日大家都花太多時間喺網上，所以更加容易出現呢種效應。」大師話，明啦，你日日睇埋嘅新聞係AI機械人推畀你睇，佢記錄晒你嘅行為習慣同偏好，於是你就一味接受AI機械人以為你鍾意又想睇嘅資訊，如是者：「你好容易同另一班跟你差不多之人，一齊建構一個共同空間，如果資訊有誤又或者是偏見，於是就產生某種集體錯誤記憶，你自己自成一體，其他人好似去咗平行宇宙咁。」

嘥氣，咁有啲人咁鍾意簡單複雜化，其實你想講習非成是，睇多啲《成語動畫廊》啦。「安仔，又唔係咁講，古代人無手機又上唔到網，時空不同，所以又唔好太過否定現代理論。」好啦，知啦，你哋話我平日上網睇嘅都係「香港優先」之新聞，香港有幾叻幾叻，隔籬埠幾渣幾渣，所以天鴿、山竹過後，我就跟埋一堆人集體記憶錯誤，以為香港無水浸，香港水浸可以申請文化遺產。

網上世界易有曼德拉效應

張翁行過嚟，勸我唔好咁勞氣，好易傷肝，佢話︰「特區政府就好醒，明知呢個網上世界好容易有曼德拉效應，所以一於學足抗疫時期咁落力，做完嘢即刻開記者招待會，一個阿Sir講完到另一個，清清楚楚，費事又會有一個平行宇宙出現，講到香港水浸到好似威尼斯咁，大家撐船返工、返學。」

我同大師兄講，好彩讀書時成績一般，無考到做AO，如果唔係，依家就真係董伯伯話齋，日日「Seven Eleven」。銀行偉插句嘴更正︰「係慘過996（9時上班、9時下班、工作6天），朝7晚11，周末、周日全部開工。」大師兄話︰「現在做官要加雙倍人工先至有得諗，你估以前，你當自己係阿Sir？」

張翁話，做官要有抱負，人工高你不如好似銀行偉咁做iBanker。銀行偉苦笑，繼續飲紅酒。

好啦，又係到食飯時間，我最鍾意食辣辣火鍋，因為可以鍛煉身體。「係呀，食得辣證明你都幾健康。」諗起重慶火鍋嗰層油，已經流晒口水，快快行，唔知使唔使等位。

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ