李辰安 - 城市错觉｜辰来之笔

打风唔成三日雨，打得成风原来仲大件事，香港，原来会水浸，我以为系集体记忆。

林村河黑雨下，途人发现有人在河中随水漂流。

黑雨下，黄大仙处处水浸。

有渠务工人在高度及膝的黄泥水中，找到地面的渠盖将它打开。

鰂鱼涌街成泽国严重水浸，多辆汽车被困水中。

观塘翠屏道水淹巴士站，巴士涉水载客。

讲明500年一遇 到处大水

大师兄首先讲：「安仔，你唔好乱噏，你不如话可以申请非主流文化遗产项目，讲明500年一遇，火星都浸。」是日好天，无雨落，开始有阵阵凉风，大家话，不如试下港铁站商场间重庆火锅，不过，都要饮杯先啦。讲开又讲，唔知是否我的童年回忆太过深刻，好似上个世纪90年代，都再无见过上环海味街水浸，一过几十年，以为最多系新界嗰边先至有鱼塘水浸，后来鱼塘都变咗商场，从此我就再无见到电视台访问水浸入铺头嘅老板吐苦水。

「世侄，上次天鸽、山竹两大台风吹到，香港大街小巷都好似公众泳池咁，乜你嗰阵时去咗火星咩。」讲呢啲，不如开支红酒热下身先。我其实话，因为当年最严重系澳门、珠海，所以抢走我嘅记忆空间，香港真系好少水浸。银行伟话︰「辰哥，你可能系网上思觉失调，嗱，大家饮杯，我再慢慢同大家分享。」我望住佢，心谂你先至思觉失调，九唔搭八。

「系，你可以话唔系思觉失调，而系曼德拉效应。」张翁伸一伸懒腰，呢啲咁玄咁飘之话题好似唔合佢口味，于是行开去搵靓仔酒保碧咸仔讲下中国足球前途，我就同大师兄继续听银行伟喺度思觉失调。

「即系咁，同曼德拉效应，呢种所谓城市集体错觉原理一样，之不过，今时今日大家都花太多时间喺网上，所以更加容易出现呢种效应。」大师话，明啦，你日日睇埋嘅新闻系AI机械人推畀你睇，佢记录晒你嘅行为习惯同偏好，于是你就一味接受AI机械人以为你锺意又想睇嘅资讯，如是者：「你好容易同另一班跟你差不多之人，一齐建构一个共同空间，如果资讯有误又或者是偏见，于是就产生某种集体错误记忆，你自己自成一体，其他人好似去咗平行宇宙咁。」

嘥气，咁有啲人咁锺意简单复杂化，其实你想讲习非成是，睇多啲《成语动画廊》啦。「安仔，又唔系咁讲，古代人无手机又上唔到网，时空不同，所以又唔好太过否定现代理论。」好啦，知啦，你哋话我平日上网睇嘅都系「香港优先」之新闻，香港有几叻几叻，隔篱埠几渣几渣，所以天鸽、山竹过后，我就跟埋一堆人集体记忆错误，以为香港无水浸，香港水浸可以申请文化遗产。

网上世界易有曼德拉效应

张翁行过嚟，劝我唔好咁劳气，好易伤肝，佢话︰「特区政府就好醒，明知呢个网上世界好容易有曼德拉效应，所以一于学足抗疫时期咁落力，做完嘢即刻开记者招待会，一个阿Sir讲完到另一个，清清楚楚，费事又会有一个平行宇宙出现，讲到香港水浸到好似威尼斯咁，大家撑船返工、返学。」

我同大师兄讲，好彩读书时成绩一般，无考到做AO，如果唔系，依家就真系董伯伯话斋，日日「Seven Eleven」。银行伟插句嘴更正︰「系惨过996（9时上班、9时下班、工作6天），朝7晚11，周末、周日全部开工。」大师兄话︰「现在做官要加双倍人工先至有得谂，你估以前，你当自己系阿Sir？」

张翁话，做官要有抱负，人工高你不如好似银行伟咁做iBanker。银行伟苦笑，继续饮红酒。

好啦，又系到食饭时间，我最锺意食辣辣火锅，因为可以锻炼身体。「系呀，食得辣证明你都几健康。」谂起重庆火锅嗰层油，已经流晒口水，快快行，唔知使唔使等位。

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ