李辰安 - 樓市股市齊飛｜辰來之筆

內地樓生晒 好日子返嚟？
 

近日股市氣氛轉好。

中山推出不少新樓盤。

美國加息周期將盡，帶動全球股市上升。

內地樓盤開始活躍。

股市漸有轉機。

趕去黃昏酒聚，中環近日氣氛很好，內房拉動股市，個個都話好日子返嚟，我要搵銀行偉傾下。

一入到去，見到大師兄揸住張樓盤傳單，入晒神咁望下望下，我側身走過去瞄一瞄，原來唔係香港樓，又唔係加拿大、英國盤，原來係中山豪宅，我問︰「終於返大灣區買樓嗱，有免費睇樓團，不如報名，我哋四個柴娃娃去參觀考察。」張翁話，唔係好慣跟團，如果有興趣，不如約車直接北上，個幾鐘頭去到珠海、中山，睇完可以再上去順德、佛山，「然後，以廣州為終點站，食完晚飯住一晚，第二日去廣州南站搭高鐵返香港，ＯＫ啦。」

銀行偉話，最高層話要調整樓市政策，內地樓即時生晒。「辰哥，如果去投資買樓，最好吼佛山、廣州，因為兩個城市會納入城中村改造，大把世界。」一時之間，唔知佢講乜，既然人齊，大家飲杯威士忌加冰，定定神。「係啦，依家股市同樓市好似食咗回春丹，下半年，抓緊機會，想窮都難。」咦，聽你咁講，等陣要問你多啲投資問題，我都想去大灣區揀個筍盤。

「世侄，早排都叫大家去睇下樓盤，趁低吸納，點知你就得個講字，依家好消息出咗嚟，相信價位會升。」大師兄話，行過街口，有人派中山樓盤單張，所以好奇攞張研究下，百幾萬一層，有埋裝修都幾抵。「銀行偉，有乜意見？」

威士忌加冰最啱慢慢傾，四個人坐埋一枱，好似開會咁認真。

銀行偉介紹城中村概念︰「其實你當香港舊區重建咁上下就得啦，即係咁，將大城市一啲老區收購再重建成新村，如是者，可以搞活個樓市之餘，又會造就一批遷拆戶有靚屋住，如果補償得好，就會製造一批高消費人士，大家眉開眼笑，內需問題可望解決。」原來係咁，聽落好似讀中學西史科，美國羅斯福新政咁，借新建設提高就業，同時刺激經濟。

有錢無嘢做好辛苦
 

「安仔，仲有係改善城中舊區居民之生活水平，一舉幾得。」所以話，廣州、佛山因為係中央點名搞城中村改造，嗰度一定好旺市。「之不過，中山都唔差，明年有中深通道，中山市中心係新樞紐。」係囉，我上網睇視頻，有位中山經紀咁話，深圳樓幾萬蚊一平（平方米），中山樓幾千蚊咋，快啲過嚟睇下啦。

銀行偉話，廣州南站都會有大型開發，到時又會有一個超級商業城，唔使十年八年，又係一片黃金地。「好啦，大家不如趕快飲埋呢杯去食飯，再深入研究。」飲酒唔好急，不如諗下有乜好嘢食先。「大家都聽過廣州有條獵德村，係全國城中村改造之經典，條村經改造之後，賣地有巨大收益，於是傳說中有村民成億身家，唔使做。」

我都聽過，廣州人有錢到揸勞斯萊斯返工。「仲返工？」係，有錢無嘢做好辛苦，於是有啲阿叔、阿姨做保安，咁先平衡到個人生活。「世侄，我都有朋友住廣州，邊有咁浪漫誇張，有人有過億補償唔出奇，個個都係億萬富豪，你估係拍電視劇咩，村民生活改善一定係，但唔好太多幻想。」

諗下諗下，香港幾時又跟風搞城中村改造？聽講旺角、油麻地有好多賣唔去之幾十年舊樓，如果趁低吸納，等特區政府拆遷補償，豈不是賺到笑？「安仔，你都九唔搭八，香港舊區重建要幾十年，到時你個孫都未有得安置啦。」明白，飲完酒，去食潮州菜。

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ