李辰安 - 魚生惹憂愁｜辰來之筆

核廢水排海 影響魚生供應？
 

日本計畫將稀釋後的福島核電廠核廢水排入大海。

日本計畫將稀釋後的福島核電廠核廢水排入大海。

日本人反對將福島核電廠核廢水排入大海。

核廢水排入大海，好多人擔心無魚生食。

核廢水排入大海，好多人擔心無魚生食。

日本計畫將稀釋後的福島核電廠核廢水排入大海，好多人擔心無魚生食，又怕溫室生果唔畀賣，我忽然想起詩人余光中之《鄉愁》，不過又畀人鬧啦！

大家暑天黃昏酒聚，不過，我想拋下書包啫，大師兄就連酒未飲，馬上話我九唔搭八。「讀書時候，邊有見過你讀新詩，你無魚生食，就亂噏乜嘢鄉愁，你都係要返屋企讀下書。」我就無回應，因為天氣太熱，我諗地球氣溫不斷上升，唔知嗰位唔開冷氣嘅老人家，如何自處？

「安仔，當年住宿舍都未有冷氣，大家咪又係咁瞓，心靜自然涼。」我想起有一年入夜都熱到出煙，無冷氣，點算好？我一共熱醒咗七次，結果沖咗六次涼。「世侄，點解唔係沖夠七次涼？」張翁，要起身上堂呀。

「想當年，有一次熱到瞓地下，地板好似涼啲，結果真係可以瞓得着。」銀行偉就話︰「嗰年喺美國讀完書返香港，飛機艙門一打開，迎面就係一陣熱風，行出去，嘩，氣都呼吸唔到，這刻，我想馬上返去，我寧願攝氏零下二十度，都唔想過熱帶人生。

大師兄瞓地下，因為佢間房好乾淨衞生，三個宿友都有潔癖，我就同兩隻污糟豬同房，瞓地下，唔好玩啦。「頭先講開無魚生食，點解講到去瞓地下，嗱嗱嗱，飲杯先，等陣至知你撐到去邊。」唔使急，慢慢嚟，講下我對心靜自然涼之經驗，有一次去台灣，住上半山野林之民宿，真係人生難忘。

「除咗熱，仲更加濕，行出去有陣霧，雖然無見太陽，但係嗰種悶同熱，簡直可以用絕望來形容，行多兩步都見暈。」啤酒好易飲完一杯又一杯，但係都未入正題，好啦，我帶頭再講食魚生。

 

選擇多多 唔怕無得食
 

「其實食魚生，好多已經係中國水產養殖，生果更加有好多選擇，大家唔使怕，最緊要慣就得嘞。」食蜜瓜可以食美國出品，食水蜜桃可以來自北京。「安仔，乜你有鄉愁，無鄉下返？定無鄉下嘢食？」我就話，我鄉下以前好興食魚生，不過，大灣區發展快速，魚塘變咗大型屋苑，所以無魚生食好耐。「世侄，我後生就食中式魚生，順德正宗食法係撈起，新年必食，不過，有人話食魚塘魚會生蟲，所以一早無食，三文魚就變成取代品，但食下食下，又話三文魚養殖太過科學化，於是又唔食三文魚，以後就唔貴唔食，我都唔知有無問題，總之自我感覺良好。」

張翁，人生真係豐富，食魚生食出唔同境界，我就從小到大，食媽媽的蒸大魚，梅菜蒸嗰款，魚生，細個未食過，不過食過生撈魚皮，都幾爽口，好食過炸魚皮，但係依家已經絕市了。「辰哥，早幾年我喺澳門一家巷仔雲吞麵鋪食過，好多葱同薑絲，又落重麻油，OK啦，我都係好鍾意食魚生。」

啤酒又來一Round，喂，差唔多，仲要食晚飯，唔好飲咁多，睇下陣間食乜？「不如食日本料理，有無得諗？」我就麻麻，事關呢味嘢唔太啱我胃口，不過我服從大多數。「咁即係反對啦，唔食日本料理，不如韓國料理？」張翁，我好鍾意食牛肉，但係熱成咁，我睇怕食唔落。「你咁挑剔，真係不如去快餐店食咖喱牛腩飯。」張翁有少少扯火，銀行偉馬上乖巧地提議，不如大家食西餐啦，「我就話豉油西餐最有特色，食焗乳鴿就Very Good啦。」都好，炒個乾炒牛河就係絕配。大師兄話，最難忘個梳乎厘，今晚一定要食。「係就快啲行啦，隨時要等位，唔好再講咁多。」好，起程！

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ