李辰安 - 鱼生惹忧愁｜辰来之笔

核废水排海 影响鱼生供应？
 

日本计画将稀释后的福岛核电厂核废水排入大海。

日本计画将稀释后的福岛核电厂核废水排入大海。

日本人反对将福岛核电厂核废水排入大海。

核废水排入大海，好多人担心无鱼生食。

核废水排入大海，好多人担心无鱼生食。

日本计画将稀释后的福岛核电厂核废水排入大海，好多人担心无鱼生食，又怕温室生果唔畀卖，我忽然想起诗人余光中之《乡愁》，不过又畀人闹啦！

大家暑天黄昏酒聚，不过，我想抛下书包啫，大师兄就连酒未饮，马上话我九唔搭八。「读书时候，边有见过你读新诗，你无鱼生食，就乱噏乜嘢乡愁，你都系要返屋企读下书。」我就无回应，因为天气太热，我谂地球气温不断上升，唔知嗰位唔开冷气嘅老人家，如何自处？

「安仔，当年住宿舍都未有冷气，大家咪又系咁瞓，心静自然凉。」我想起有一年入夜都热到出烟，无冷气，点算好？我一共热醒咗七次，结果冲咗六次凉。「世侄，点解唔系冲够七次凉？」张翁，要起身上堂呀。

「想当年，有一次热到瞓地下，地板好似凉啲，结果真系可以瞓得着。」银行伟就话︰「嗰年喺美国读完书返香港，飞机舱门一打开，迎面就系一阵热风，行出去，哗，气都呼吸唔到，这刻，我想马上返去，我宁愿摄氏零下二十度，都唔想过热带人生。

大师兄瞓地下，因为佢间房好乾净衞生，三个宿友都有洁癖，我就同两只污糟猪同房，瞓地下，唔好玩啦。「头先讲开无鱼生食，点解讲到去瞓地下，嗱嗱嗱，饮杯先，等阵至知你撑到去边。」唔使急，慢慢嚟，讲下我对心静自然凉之经验，有一次去台湾，住上半山野林之民宿，真系人生难忘。

「除咗热，仲更加湿，行出去有阵雾，虽然无见太阳，但系嗰种闷同热，简直可以用绝望来形容，行多两步都见晕。」啤酒好易饮完一杯又一杯，但系都未入正题，好啦，我带头再讲食鱼生。

 

选择多多 唔怕无得食
 

「其实食鱼生，好多已经系中国水产养殖，生果更加有好多选择，大家唔使怕，最紧要惯就得嘞。」食蜜瓜可以食美国出品，食水蜜桃可以来自北京。「安仔，乜你有乡愁，无乡下返？定无乡下嘢食？」我就话，我乡下以前好兴食鱼生，不过，大湾区发展快速，鱼塘变咗大型屋苑，所以无鱼生食好耐。「世侄，我后生就食中式鱼生，顺德正宗食法系捞起，新年必食，不过，有人话食鱼塘鱼会生虫，所以一早无食，三文鱼就变成取代品，但食下食下，又话三文鱼养殖太过科学化，于是又唔食三文鱼，以后就唔贵唔食，我都唔知有无问题，总之自我感觉良好。」

张翁，人生真系丰富，食鱼生食出唔同境界，我就从小到大，食妈妈的蒸大鱼，梅菜蒸嗰款，鱼生，细个未食过，不过食过生捞鱼皮，都几爽口，好食过炸鱼皮，但系依家已经绝市了。「辰哥，早几年我喺澳门一家巷仔云吞面铺食过，好多葱同姜丝，又落重麻油，OK啦，我都系好锺意食鱼生。」

啤酒又来一Round，喂，差唔多，仲要食晚饭，唔好饮咁多，睇下阵间食乜？「不如食日本料理，有无得谂？」我就麻麻，事关呢味嘢唔太啱我胃口，不过我服从大多数。「咁即系反对啦，唔食日本料理，不如韩国料理？」张翁，我好锺意食牛肉，但系热成咁，我睇怕食唔落。「你咁挑剔，真系不如去快餐店食咖喱牛腩饭。」张翁有少少扯火，银行伟马上乖巧地提议，不如大家食西餐啦，「我就话豉油西餐最有特色，食焗乳鸽就Very Good啦。」都好，炒个乾炒牛河就系绝配。大师兄话，最难忘个梳乎厘，今晚一定要食。「系就快啲行啦，随时要等位，唔好再讲咁多。」好，起程！

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ