李辰安 - 無啖好食｜辰來之筆

美國國務卿布林肯早前訪華。

美國務卿布林肯無啖好食？

美國人自細都飲汽水大，有幾多個識歎中國茶？

美國國務卿布林肯（左）早前訪華。

外長秦剛在北京同美國國務卿布林肯舉行會談。

中美宴會餐單 上網搵極都無

美國國務卿布林肯訪問中國，以為有中美宴會餐單流出，點知上網搵極都無，唔通佢唔使開餐？

大師兄開口講：「安仔，你都九唔搭八，兩個大國密斟係關係全球大事，一定全程爭取時間，又點會有閒情逸致，講飲講食，話咗你係小人物啦，無乜格局，食包啦。」今日都好熱，不過好在照落大雨，我伸長隻手遞隻碗過去，接住大師兄個包，感覺我好幸運，因為唔係大人物，所以偷得浮生全日都得閒，放幾日大假休息，依家仲有包包食，人生何求？

「講唔定美國一行人等中場休息食漢堡包，因為巨無霸以上級數有保溫盒，頂得肚又好味？」銀行偉仲補充以上場景︰「坐對面之東方大國代表，一定係攞壺滾水沖杯麵，食完可以回氣，講嘢都大聲啲。」張翁話︰「不如就點個鴻圖窩麵，唔使食杯麵咁寡啦，我哋吹水啫，又唔係講世界大事。」今日唔好蒸魚喇，依家好多石斑都係皮粗肉厚，揀得上手又貴，不如食多幾款點心。「好，不過，我想食黑毛豬叉燒。」老闆話，不如食隻片皮鴨，今日唔使預訂，因為有人甩底。呢啲係咪叫做「執死鴨」？都係唔好講，等陣會畀人鬧，因為鴨，尤其是鴨頭呢家嘢好敏感，你知喇，唔使講到明。
 

 

美國人飲汽水大 唔識歎中國茶
 

講時講，美國一行人今次有無人招呼佢哋飲中國茶，一場嚟到，唔通都係飲汽水？「世侄，美國人自細都飲汽水大嘅，有得幾多個識歎中國茶？係都飲美國齋啡醒神，飲中國茶好似唔多合適。」今日飲陳年普洱，聽講唔好飲咁濃，因為破壞體內營養。

「我返大灣區飲茶就好合養生原則，因為你叫壺普洱，有服務員幫你沖，唔會放好一壺茶等你班茶客飲到埋單為止，即沖即斟，唔會濃到墨汁咁。」好彩無畀茶樓老闆聽到，你知啦，依家請樓面難過請太空人，搵人幫你即沖即斟，收你幾多茶錢先？「大家亦唔需要太介意，有幾可呀，一個星期飲一次半次茶，不如下次安仔你自己帶私人茶具，淨係要老闆供應滾水，好唔好？」

其實，香港地好難有飲食要求。「係啦，大家覺唔覺上世紀七十年代，香港美食威水到歐洲、美國、日本都派人過嚟採訪，當時一席滿漢全席，真係經典，點知依家講香港美食，清一色帶大家食巷仔茶餐廳，食腸仔煎蛋，飲杯奶茶。」銀行偉話，佢有試過去深水埗食薑絲豬膶公仔麵，幾有特色。

大師兄話，真係要去巷仔尋寶，「唔好睇少碗薑絲豬膶公仔麵，你去到乜乜商場連鎖店嘅所謂茶餐廳，你會食到成塊薑嘅豬膶公仔麵，可惱也！」唉，你咁有要求，只有兩個選擇，一係返屋企自己切薑絲，一係返大灣區早少少享受你的退休生活，香港地，請人又貴，交租仲更加貴，香港美食再唔係講口味，而係講生存，我想贈你一句「九唔搭八」，不過尊重你輩分，我都係食多件棉花雞。

「安仔，乜你最近有去過大灣區咩，點解無預大家一齊去？」都係抽起條筋，成班柴娃娃過去，並無細心策劃，都係求其是但，不過，我都怕大灣區唔使好耐咁，學足香港一樣，所以有時間多啲上去享受一下，再唔係，你會發覺去到中山、珠海、順德都好似賓至如歸。「已經係啦，你上去都發現有太多港式品牌飲食，尤其是大商場，好快香港化。」聽到都無癮，遲啲要去到山西、江西先有家鄉風味。

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ