李辰安 - 无啖好食｜辰来之笔

美国国务卿布林肯早前访华。

美国务卿布林肯无啖好食？

美国人自细都饮汽水大，有几多个识叹中国茶？

美国国务卿布林肯（左）早前访华。

外长秦刚在北京同美国国务卿布林肯举行会谈。

中美宴会餐单 上网搵极都无

美国国务卿布林肯访问中国，以为有中美宴会餐单流出，点知上网搵极都无，唔通佢唔使开餐？

大师兄开口讲：「安仔，你都九唔搭八，两个大国密斟系关系全球大事，一定全程争取时间，又点会有闲情逸致，讲饮讲食，话咗你系小人物啦，无乜格局，食包啦。」今日都好热，不过好在照落大雨，我伸长只手递只碗过去，接住大师兄个包，感觉我好幸运，因为唔系大人物，所以偷得浮生全日都得闲，放几日大假休息，依家仲有包包食，人生何求？

「讲唔定美国一行人等中场休息食汉堡包，因为巨无霸以上级数有保温盒，顶得肚又好味？」银行伟仲补充以上场景︰「坐对面之东方大国代表，一定系攞壶滚水冲杯面，食完可以回气，讲嘢都大声啲。」张翁话︰「不如就点个鸿图窝面，唔使食杯面咁寡啦，我哋吹水啫，又唔系讲世界大事。」今日唔好蒸鱼喇，依家好多石斑都系皮粗肉厚，拣得上手又贵，不如食多几款点心。「好，不过，我想食黑毛猪叉烧。」老板话，不如食只片皮鸭，今日唔使预订，因为有人甩底。呢啲系咪叫做「执死鸭」？都系唔好讲，等阵会畀人闹，因为鸭，尤其是鸭头呢家嘢好敏感，你知喇，唔使讲到明。
 

 

美国人饮汽水大 唔识叹中国茶
 

讲时讲，美国一行人今次有无人招呼佢哋饮中国茶，一场嚟到，唔通都系饮汽水？「世侄，美国人自细都饮汽水大嘅，有得几多个识叹中国茶？系都饮美国斋啡醒神，饮中国茶好似唔多合适。」今日饮陈年普洱，听讲唔好饮咁浓，因为破坏体内营养。

「我返大湾区饮茶就好合养生原则，因为你叫壶普洱，有服务员帮你冲，唔会放好一壶茶等你班茶客饮到埋单为止，即冲即斟，唔会浓到墨汁咁。」好彩无畀茶楼老板听到，你知啦，依家请楼面难过请太空人，搵人帮你即冲即斟，收你几多茶钱先？「大家亦唔需要太介意，有几可呀，一个星期饮一次半次茶，不如下次安仔你自己带私人茶具，净系要老板供应滚水，好唔好？」

其实，香港地好难有饮食要求。「系啦，大家觉唔觉上世纪七十年代，香港美食威水到欧洲、美国、日本都派人过嚟采访，当时一席满汉全席，真系经典，点知依家讲香港美食，清一色带大家食巷仔茶餐厅，食肠仔煎蛋，饮杯奶茶。」银行伟话，佢有试过去深水埗食姜丝猪膶公仔面，几有特色。

大师兄话，真系要去巷仔寻宝，「唔好睇少碗姜丝猪膶公仔面，你去到乜乜商场连锁店嘅所谓茶餐厅，你会食到成块姜嘅猪膶公仔面，可恼也！」唉，你咁有要求，只有两个选择，一系返屋企自己切姜丝，一系返大湾区早少少享受你的退休生活，香港地，请人又贵，交租仲更加贵，香港美食再唔系讲口味，而系讲生存，我想赠你一句「九唔搭八」，不过尊重你辈分，我都系食多件棉花鸡。

「安仔，乜你最近有去过大湾区咩，点解无预大家一齐去？」都系抽起条筋，成班柴娃娃过去，并无细心策划，都系求其是但，不过，我都怕大湾区唔使好耐咁，学足香港一样，所以有时间多啲上去享受一下，再唔系，你会发觉去到中山、珠海、顺德都好似宾至如归。「已经系啦，你上去都发现有太多港式品牌饮食，尤其是大商场，好快香港化。」听到都无瘾，迟啲要去到山西、江西先有家乡风味。

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ