李辰安 - 爺孫戀｜辰來之筆
2023-04-18 00:00 
台灣66歲音樂人李坤城和26歲妻子林靖恩多年前公開戀情，最近男方已經去咗第二度，人生好化學，小心！
大清都興呢種愛情遊戲
我對爺孫戀無乜意見，大清皇朝好多名人和大官都係興呢種愛情遊戲，之不過，讀中史時無人講呢一筆，後來睇內地電視劇先知道，17歲配71歲已經好正常。好耐無去飲茶，老闆又去咗大灣區，聽講去咗中山，事關明年深圳同中山條跨海橋通車，可能帶旺中山呢一邊。「不過，返內地搞飲食好大競爭力，除非你好有計，否則都難衝出重圍。」
張翁回顧二十幾三十年前嘅深圳，當地最旺係按摩同打邊爐，未有耐出現高科技行業。「唔知邊班人咁勇，喺深圳打出一個重慶火鍋市場，搞到成行成市。」我都有印象，最難頂係狀元紅火鍋，湯底之上是一層厚厚之辣椒油，一個唔覺意，你會吸入成口紅油，直入氣管之後，馬上發生強烈之化學作用，我曾經咳到唔識出聲，成餐飯坐喺度無反應。
「安仔，你都九唔搭八，見到成層辣椒油仲要搏命滾，你知我哋廣東人唔食得辣。」銀行偉話有冬瓜盅上市，不如清清地，唔好又話食辣椒油咁搞鬼啦。「一於咁話，講下講下又到夏天，不如整多一個荷葉飯。」其實講開爺孫戀，真係好似食重慶火鍋一樣，身體搞得掂，你可以樂在其中，不知幾咁享受，如果學似我一樣咁水土不服，產生強烈化學作用，咁就好難搞。「當日我就氣喘如牛，成個面紅晒。」大家聽到偷偷地笑。
兩老結婚日日遊山玩水
今日天氣未係好熱，心情都幾好，講開男人經，眾人更加精神，大師兄同大家分亨一個內地熱門爛Gag。「內地男女依家再唔似十幾二十年前，20歲就拍拖，21歲結婚，22歲生仔，好多城市男女年過四十都無打算結婚，於是有一個笑話諷刺呢個時尚。」張翁話，咪講住先，不如叫多幾款點心先，反正大家好胃口。
你知內地人話，男女最適宜結婚係乜嘢年齡？「原來男人60歲同女人55歲係絕配。」吓，加埋百幾歲，咁行婚禮當日嘅花仔、花女有幾大？30歲起碼？「安仔，你都多餘，兩老行婚禮使乜花仔花女。」銀行偉話，應該搵花佬、花婆。男女最好係退休年齡附近結婚，事關一結婚就差唔多唔使做，大家有退休金，日日可以行山跑步，同時大家都唔使為生BB煩惱。「仲有，兩個老人家結婚，好大機會無婆媳關係糾纏，男人又唔怕外父、外母多要求，呢個時期先至係真正嘅『金童玉女』，幾Free、幾High呀！」
之前都講過，日本老人家談戀愛已經產業化，好多伯爺公、老婆婆想搵個伴，老人家相睇成為風氣，現代媒人生意吃香。「不過，我講爺孫戀，點解大家兜咗去隔籬講老人結婚。」張翁回憶幾十年前有一部奧斯卡得獎名片《金池塘》，男一係亨利方達，女主係嘉芙蓮協賓，女配角係珍方達，即係亨利方達個女，真係好經典。「張翁，我無睇過呢部戲，講乜㗎？」簡單講，係一段好複雜之老年夫婦同女兒的家庭關係，同老年人談戀愛無關，但係好細膩捕捉兩個年屆80歲的夫婦心境。
老人家亦有內心世界，你可以好似亨利方達咁平靜，亦可以追求爺孫戀，或者浪漫黃昏戀，不過，正如香港名人話齋，乜都係假，最緊要量力而為。「安仔，食冬瓜啦！可以清心火。」哦，你都食多碗荷葉飯，補補身，你知我想講乜啦！
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料：https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應