李辰安 - 中學生你至叻｜辰來之筆

大學生搵錢差過中學生，咁又點呢？唔鍾意唔好讀囉。睇見依家啲後生仔心態，已經對四方帽無晒感覺。

 

中學生升學或就業機會較以前多。

中學生通過網上學習。

中學生升學或就業機會較以前多。

每年有不少大學生加入勞動市場。

大學生畢業後，到就業展覽會尋找工作機會。

香港基建蓬勃，建築界求才若渴。

紮鐵是高收入工種。

近年內地開辦不少技術學校。

蓋茲係商業奇才，12歲已利用學校電腦，寫軟件賺錢。

蘋果「教主」喬布斯。

蓋茲、喬布斯無戴四方帽

 

大家又在黃昏酒聚，大師兄話大學沙紙唔值錢，已經係好 多年之現象，靠讀大學提升社會地位，你咪癲啦，唔畀人笑都已經好啦。「係噃，軟件大王蓋茲同蘋果教主喬布斯都無戴四方帽，於是好多人話，叻仔唔好讀大學，留啲學位畀無咁叻仔人士，先至係對社會貢獻。」

蓋茲係商業奇才，12歲已經利用學校有電腦之便，幫學校寫軟件賺錢，又同家長合作，佢做老闆，收入相當唔錯，所以呢位奇才不但無心機讀大學，連工都唔想打。張翁今日飲威士忌，大家都陪下佢，坐低慢慢講、慢慢歎，享受真正人生。

「你兩師兄弟點解去鄉下大學嘥四年時間搵個學位？」係囉，香港有兩位特首都唔係大學生，比例相當高，我同大師兄當年入大學好簡單，大家都因為當年大學學費平。「安仔，學費幾千蚊一年，同讀私立高中差唔多，仲有政府免息貸款，又有好多獎學金、助學金，你話去邊度搵？」

銀行偉話佢有位老同事係本港大學生，佢讀大學之理由更加奇妙。「點解讀大學？你知啦，如果幾十年前要入一個有大小泳池、十幾個網球場，又有室內籃球場加羽毛球場等等之私人會所，入會費要二十萬元起表，所以大學取錄佢，就開心到幾晚瞓唔着。」

我同張翁摸住酒杯底講︰「畢業之後可以申請校友證，好多設施都可以用，係咪正先。」我仲想講，幾十年前讀大學，有咗一個大學生身分，去Party識女仔都容易好多，「至少比中學生略有優勢。」張翁話，上世紀六十年代做大學生好比地位升級，「事關當年大學只有一家，你畢業出嚟不難考到政 府工，即係變咗阿Sir。」就算唔做官，教書都唔差，張翁有個Friend教而優當官，即係轉去教育局做，升咗兩、三級咁上下，退休之後有優厚長俸，仔女全部英國大學讀書，「最誇張係佢識投資買樓，依家南區同半山都有樓。」 　

 

　
近年基建蓬勃 求才若渴

 

好啦，讀大學有好有唔好，睇你係乜嘢材料，不過，時隔幾個十年，大學學位愈來愈多，所以競爭好激烈，讀完大學可能搵得一萬二、三千，如果你肯接受職業訓練做技術工人，或者更進取當建築工人，大學生一季收入，可能都唔及你一個月。

「我記得十幾廿年前，香港基建蓬勃，建築界求才若渴，於是當局拍條宣傳片，由一名陽光青年扮地盤工人，佢收工之後沖乾淨涼，成個型男咁款，鏡頭一轉就拖住嬌俏可人之女生出街，型男轉個頭同大家講，佢份工仲好高薪酬。」對，當年已有社會信息傳遞，大學生再唔係唯一天之驕子，你學紮鐵真係高收入工種。張翁補充︰「我中學有位同學，雖然大家都係名校畢業生，佢不但無讀大學，更加無考慮留學，直接去學搭棚。」原來這位朋友屋企係做建築工程，五十幾年前，搭棚日薪一百元，開二十日工，人工都高過做官。

講到讀書，其實都幾落後，因為互聯網時代，學生上網搵料可以快過老師，如果唔係因為搞科學技術，日日入實驗室操練，你去讀博士都幾費時失事，內地已經有人提出不如多辦技術學校好過。「安仔，唔好講咁多，博士唔係銜頭，有時間你寫下網絡小說好過，係呢，近排有乜題材？」講呢啲，飲杯啦。

 

《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料：https://bit.ly/3IMunqd
你的獨家報料一旦被採用及報導，將獲得乙份獎品。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ