李辰安 - 旅日大熊貓 約滿返鄉下｜辰來之筆

約滿回國 日人揮淚送別 

日本大熊貓約滿回國，當地人有情有義有眼淚送行，我想知，國家以後是否再會行熊貓外交呢？

我好幸運，細細個跟屋企返廣州，就到過動物園與國寶見面，不過，當時我唔係好領情，印象中大熊貓並非黑白色。「安仔，你唔好又喺度噏三噏四，坐定定飲杯茶先啦。」還好，無畀人鬧我九唔搭八，咁就真係要坐低飲杯茶食個包先。今天有少少悶熱，唔想飲普洱，不如叫壺壽眉清清地。

旅日大熊貓「永明」。

遊客在日本東京上野動物園觀看大熊貓。

旅日大熊貓「永明」。

日本民眾慶祝大熊貓到來50周年。

日本工作人員運送大熊貓。

日本遊客惜別大熊貓。

「大師兄，我好記得當時大熊貓係成日碌地沙，成身泥黃色，當年無乜嘢玻璃房咁進步，大家同國寶可以直接面對面，無阻無隔。」想當年，我好百厭，去到動物園周圍走，成家人想同大熊貓影相，我就行去隔籬想搵老虎，於是畀阿爸阿媽「醒」咗一番，我仲記得。

「日本人唔知係咪咁長情，搞到好似做電視劇大結局咁感人，之不過，日本人一向都好有禮貌，我哋要學下人。」銀行偉，你真係九唔搭八，我哋中國人學日本人乜嘢好呢？依家連廣東歌都自己創作啦，你以為家陣係五輪真弓、澤田研二時代？當然，我唔會講出口，只不過想話佢知，今時今日，日本車都賣輸畀國產車啦，因為國產電動車已經後來居上，日本好難再保持汽車製造大國地位，遲多十年八載，日本成街汽車都係中國製造。

「辰哥，日本車的確唔夠國貨競爭力，因為國產車大力開發非洲市場，呢一個先至係大市場，加埋中國內地需求，日本好快連中國車尾燈都見唔到，所以我建議大家買長綫股投資，一定要睇住內地幾家著名品牌，無點你。」係囉，好快可以港車北上，如果穩陣計，買國產電動車就OK啦，因為維修同充電都好方便，第二時可以由中環揸車直上廣州，唔使行路咁勞嘈啦。

張翁話，天氣忽冷忽熱又潮濕，最好係食山珍野菜，茶樓老闆話大灣區近年興呢味嘢，佢仲打算由內地引進。「係呢，老闆又走咗返內地，早幾日飲早茶話國家着重綠色發展，農業農村現代化係未來經濟新動力，所以山旯旮野菜愈嚟愈潮，成為美食新風氣。」聽講野菜好有益，依家疫情過後，大家都着重增強免疫力，食埋啲垃圾速食，好唔得掂，食清清地就Very Good。不過，老闆就未有野菜賣，大家食住新界菜先啦。

 

想睇熊貓 搭飛機去中國
 

講開又講，世界經濟唔好景，疫情三年，好多動物園無咗收入，養唔起珍貴動物，尤其是中國國寶大熊貓。「你知唔知，外國動物園要每年納租畀我哋，從中國直接進口新鮮青竹，大熊貓有乜頭暈身熱，要請中國專家飛過去，你話要花幾多錢？」係囉，大家連工都無得開，點照顧大熊貓，依家中國最有錢，就不如送返過去中國算把啦，想睇大熊貓，唔該你搭飛機去中國，最好去四川熊貓之鄉，我上網見到當地山旯旮農村個閉路電視影到有「大熊貓出沒」，簡直好似鄉里過嚟串門一樣。

日本人揮淚送走大熊貓「香香」返鄉下，相信以後都無乜機會再有中國國寶過來，一個時代完結了，大熊貓只有中國養得起，你送畀我都唔使考慮，。張翁話，佢三十年前去日本，日本有錢到令人羨慕，閒閒一個大企普通人員都成身名牌，放假打高爾夫球，收入高過香港公司總經理，諗都諗唔到依家變成「日本熊貓，要早啲還」。「韓國經濟都好似話要過日本頭，你話係咪心噏呢？」講呢啲，大家食燒賣啦！

 

《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料：https://bit.ly/3IMunqd
你的獨家報料一旦被採用及報導，將獲得乙份獎品。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ