李辰安 - 去日本定係韓國好？｜辰來之筆

是日又一早去到中環小酒館，不過，大師兄更加早我一步，係噃，佢可以準時放工，所以咁遠行過嚟都快過我。「我話就無謂去日本，一則香港人太多，人山人海，去到各個打卡點，就好似小香港，你花咁多錢，同埋冒咁大風險為乜？不如去海洋公園，再唔係去迪士尼。」銀行偉剛剛同張翁趕到，兩個人起勢咁講2023年股市走勢，佢哋話，點解唔坐高鐵周圍遊。

「去北京都係幾個鐘，話咁快就到，如果去廣州，未飲完杯茶都到埗，我就唔會去日本嘞，有乜新鮮感啫。」我就話，不如去韓國，事關呢一個係流行文化先進國家，值得香港人學習。「安仔，你就講得啱，你知唔知，美國最近發布一個國家實力排行榜，首三位係美國、中國、俄羅斯，大家都知，原來韓國目前排在歐洲大國德國、英國之後，榮登第六位，勁呀。」咦，日本排第幾？你講埋先啦。

大家話叫一打國產啤酒賀下中國As number two先，好，好提議，國產啤有一股濃厚之花香味，呢個正一係我杯茶，最怕飲美國啤酒，好似飲水咁淡。「安仔，洋人都鍾意中國啤酒。」不過，話時話，我近日上網見到內地某鄉鎮有班老友聚頭，去露天食檔歎美食，我的天呀，佢哋用個透明膠袋買啤酒，原來仲係斷斤秤。

「世侄，呢啲係風味，泰國都興㗎，不過，我就未試過，因為接受唔到呢種包裝。」講時講，中國可以榮登世界第二大國，主要係中國市場夠大，經濟引擎馬力充足，至於俄羅斯可以排第三，原因再唔係因為係軍事強國，而係世界最大能源國，講起有點感慨。

我上網睇下個實力排行榜，有兩大驚訝，一是日本排第八，想當年，我讀書時代，日本自稱係As number one，搞下搞下，經濟迷失二十年，仲係僅次美國成為第二，點知依家排到法國之後，畀韓國超過兩個身位，真係意想不到。「其實韓國流行文化真係好犀利，上世紀九十年代，香港電影同流行曲，乃亞洲之寶，韓國好多Fans，依家就調轉來。」

講時講，上世紀八、九十年代，香港好多經典金曲係來自日本，如果你話韓國Fans都Like廣東Pop，即係韓國人間接捧日本場。韓國同日本好似唔多Friend，韓國人見到超越日本，開心程度高過自己排第六，不過，韓國人都唔係好睇中國台戲，因為韓流世界化，美國、歐洲不知幾多韓迷，你睇歐美名牌都搵Lisa姐嗰隊女子組合做代言人，你就知幾巴閉。「嗰位Lisa姐係泰國人嚟，不過經過韓國成功包裝，變成真人芭比，泰國以Lisa姐為榮，韓國Fans愛屋及烏，對泰國美食推崇不已，香港唔好話自己係美食天堂，依家有乜好食？」

銀行偉，你此言差矣，你有無去過深水埗覓食，嗰度有好多隱形美食。「安仔，大埔都有唔少，灣仔、九龍城亦有好多，問題係有無人去大力宣傳。」我就話中環都唔錯，大家成日去開嗰家茶樓咪幾好，教大家整個菜遠牛肉煎麵，不知幾有特色又滋味，脆皮燒腩仔亦一絕。

「唔好講啦，大家肚餓，講回正題，大家去邊度旅行？」我話農曆新年要去大嶼山，等到暑假先至放大假出門，日、韓未必係我心水，返內地都OK，不過，咁耐無去，不如去泰國，搵下Lisa姐屋企開之食店打卡，一於咁話。