李辰安 - 去日本定系韩国好？｜辰来之笔

是日又一早去到中环小酒馆，不过，大师兄更加早我一步，系噃，佢可以准时放工，所以咁远行过嚟都快过我。「我话就无谓去日本，一则香港人太多，人山人海，去到各个打卡点，就好似小香港，你花咁多钱，同埋冒咁大风险为乜？不如去海洋公园，再唔系去迪士尼。」银行伟刚刚同张翁赶到，两个人起势咁讲2023年股市走势，佢哋话，点解唔坐高铁周围游。

「去北京都系几个钟，话咁快就到，如果去广州，未饮完杯茶都到埗，我就唔会去日本嘞，有乜新鲜感啫。」我就话，不如去韩国，事关呢一个系流行文化先进国家，值得香港人学习。「安仔，你就讲得啱，你知唔知，美国最近发布一个国家实力排行榜，首三位系美国、中国、俄罗斯，大家都知，原来韩国目前排在欧洲大国德国、英国之后，荣登第六位，劲呀。」咦，日本排第几？你讲埋先啦。

大家话叫一打国产啤酒贺下中国As number two先，好，好提议，国产啤有一股浓厚之花香味，呢个正一系我杯茶，最怕饮美国啤酒，好似饮水咁淡。「安仔，洋人都锺意中国啤酒。」不过，话时话，我近日上网见到内地某乡镇有班老友聚头，去露天食档叹美食，我的天呀，佢哋用个透明胶袋买啤酒，原来仲系断斤秤。

「世侄，呢啲系风味，泰国都兴㗎，不过，我就未试过，因为接受唔到呢种包装。」讲时讲，中国可以荣登世界第二大国，主要系中国市场够大，经济引擎马力充足，至于俄罗斯可以排第三，原因再唔系因为系军事强国，而系世界最大能源国，讲起有点感慨。

我上网睇下个实力排行榜，有两大惊讶，一是日本排第八，想当年，我读书时代，日本自称系As number one，搞下搞下，经济迷失二十年，仲系仅次美国成为第二，点知依家排到法国之后，畀韩国超过两个身位，真系意想不到。「其实韩国流行文化真系好犀利，上世纪九十年代，香港电影同流行曲，乃亚洲之宝，韩国好多Fans，依家就调转来。」

讲时讲，上世纪八、九十年代，香港好多经典金曲系来自日本，如果你话韩国Fans都Like广东Pop，即系韩国人间接捧日本场。韩国同日本好似唔多Friend，韩国人见到超越日本，开心程度高过自己排第六，不过，韩国人都唔系好睇中国台戏，因为韩流世界化，美国、欧洲不知几多韩迷，你睇欧美名牌都搵Lisa姐嗰队女子组合做代言人，你就知几巴闭。「嗰位Lisa姐系泰国人嚟，不过经过韩国成功包装，变成真人芭比，泰国以Lisa姐为荣，韩国Fans爱屋及乌，对泰国美食推崇不已，香港唔好话自己系美食天堂，依家有乜好食？」

银行伟，你此言差矣，你有无去过深水埗觅食，嗰度有好多隐形美食。「安仔，大埔都有唔少，湾仔、九龙城亦有好多，问题系有无人去大力宣传。」我就话中环都唔错，大家成日去开嗰家茶楼咪几好，教大家整个菜远牛肉煎面，不知几有特色又滋味，脆皮烧腩仔亦一绝。

「唔好讲啦，大家肚饿，讲回正题，大家去边度旅行？」我话农历新年要去大屿山，等到暑假先至放大假出门，日、韩未必系我心水，返内地都OK，不过，咁耐无去，不如去泰国，搵下Lisa姐屋企开之食店打卡，一于咁话。