李辰安 - 做美斯好過做皇帝｜辰來之筆

做打工仔好過做王子，我今日為之頓悟，細個唔識性，以為老爸係皇帝就好嘞，其實一言難盡。

今日又係午間茶聚，銀行偉話下個禮拜一家去日本旅行，所以同佢餞行。「辰哥，你估上世紀六十年代咩，餞行我就擔當唔起啦，我又唔係坐船去日本，搭飛機好快返，玩幾日旨在用咗啲獎賞里數，你以為我去日本做國事訪問？」偉哥，講下笑都唔得，使乜咁認真。「今日不如食個豉椒排骨煎麵？」大師兄問點解︰「日本你可以食拉麵，不過，就無煎麵，尤其是係用廣東麵煎嘅，包你去到日本食唔到。」

日本拉麵真係有水準，是但喺街邊食都好過中式拉麵。「因為中式拉麵唔係好講究，多數係味精湯，加鹹到唔鹹之拉麵，食到你不知如何是好。」講開又講，日本有匠人精神，亦好認真，你睇日本隊今屆喺卡塔爾嘅表現就知。「安仔，你講日本球迷又係主動喺場館執垃圾呀？」大師兄，唔好咁有偏見，我講日本隊踢波已經去到接近歐洲、南美水準，中國男足你話幾失禮。

大師兄忽然坐正個身，望住我講︰「唔好成日搵中國男足講啦，你有無國家感情？人踩你又踩，一啲文化自信都無。」張翁見到有火花，馬上帶過話題︰「其實上世紀六十年代，日本足球在香港之下，連香港球員組成之台灣隊亦可以輕易勝日本。」大哥，幾十年前啦，依家日本隊勁到可以捧世盃，不過，差少少運啫。「點解日本隊近二、三十年如此進步？」偉哥，我諗同日本有《足球小將》卡通片有關，日本七、八十後畀戴志偉洗腦，洗到足球突飛猛進，內地就只有灰太郎，但無中華足球小將，所以踢下踢下踢返轉頭囉。

大家講開煎麵，香港酒樓一般係用油炸，邊有咁得閒同你煎到兩面黃，然後中間還有一個軟腍腍之麵心，點解咁是但求其？因為無日本人之執着講究，香港係醒目仔文化，最緊要快手快腳搞掂，賺到錢就係叻仔，唔好封個煎麵達人，或者煎麵大王個朵畀我。呢家茶樓個老闆係張翁老友，所以煎麵唔會偷工減料，真係好用心幫你慢慢煎，呢啲係口福，可遇不可求。

老闆行過，聽到大家咁讚賞，即時笑晒口。「去日本好玩呀，不過聽老友去完返嚟講，日本打卡地點、購物必去處，好似小香港咁，成街都係大大聲港式廣東話。」我唔想掃銀行偉興，於是又將話題帶到去另一邊。「講開又講，你話做平民百姓幾好，去到邊都無人知你係邊個，大大聲周街嘈無問題，食嘢食得土豪，亦唔會有人喺你背後批評，所以我好感恩自己唔係英國皇室人員。」

大師兄話做中東王子都OK，不過做到英國王子就差好遠。「係囉，嗰位英國二王子同屋企唔妥，佢自己好有骨氣唔黐皇室金糠，搬去美國住，點知原來無錢度日。」最淒涼係想打電話畀老爸求助，呢位老爸竟然唔接電話，大家只可以電郵溝通。

「係噃，英皇查理斯三世同傳媒爆料，話二王子成日問佢攞錢，你當我開銀行？於是同佢割蓆咁話。」我心諗，呢位父皇都幾坦白，原來做皇帝唔係好似銀行家咁疊水，即係窮啦，無錢又無權，但日日要你拋頭露面，呢份工搵你去做，我喺中環打份牛工都不知幾消遙，得閒去日本，平時可以同班老友飲茶或者飲酒。

「家家有本難唸的經，你以為自己仲細咩，你仲生活在童話世界？醒下啦。」大師兄，關我乜事，我無羨慕過做王子，我只係想開開心心打工，交稅唔使問銀行借，如願足矣。何況我老爸做皇帝都無能力照顧我，大時大節着到王子咁出場，都無幾多出場費，仲有可能義務演出，算把啦，留畀你做大龍鳳。

張翁話︰「做唔做王子唔到你揀嘅，你抽到支好籌咪做王子，最好當然係石油大國之貴族，不過，睇你好彩唔好彩。」如果有得揀，我最想做足球超級明星，我就唔多羨慕C朗，踢波踢到頭筋都現。「我都咁話，最好做美斯（見圖），成場行下行下，當散步兼養生，有波傳過嚟先至踢兩腳，行下行下賺到億億聲美金，真係好過做王子。「錯，係好過做皇帝，你睇下查理斯近排幾躁底，行出街仲要驚畀人擲雞蛋，大佬，我欠咗你哋咩。」

好啦，食完去開工，遲啲我都放假。