李辰安 - 做美斯好过做皇帝｜辰来之笔

做打工仔好过做王子，我今日为之顿悟，细个唔识性，以为老爸系皇帝就好嘞，其实一言难尽。

今日又系午间茶聚，银行伟话下个礼拜一家去日本旅行，所以同佢饯行。「辰哥，你估上世纪六十年代咩，饯行我就担当唔起啦，我又唔系坐船去日本，搭飞机好快返，玩几日旨在用咗啲奖赏里数，你以为我去日本做国事访问？」伟哥，讲下笑都唔得，使乜咁认真。「今日不如食个豉椒排骨煎面？」大师兄问点解︰「日本你可以食拉面，不过，就无煎面，尤其是系用广东面煎嘅，包你去到日本食唔到。」

日本拉面真系有水准，是但喺街边食都好过中式拉面。「因为中式拉面唔系好讲究，多数系味精汤，加咸到唔咸之拉面，食到你不知如何是好。」讲开又讲，日本有匠人精神，亦好认真，你睇日本队今届喺卡塔尔嘅表现就知。「安仔，你讲日本球迷又系主动喺场馆执垃圾呀？」大师兄，唔好咁有偏见，我讲日本队踢波已经去到接近欧洲、南美水准，中国男足你话几失礼。

大师兄忽然坐正个身，望住我讲︰「唔好成日搵中国男足讲啦，你有无国家感情？人踩你又踩，一啲文化自信都无。」张翁见到有火花，马上带过话题︰「其实上世纪六十年代，日本足球在香港之下，连香港球员组成之台湾队亦可以轻易胜日本。」大哥，几十年前啦，依家日本队劲到可以捧世杯，不过，差少少运啫。「点解日本队近二、三十年如此进步？」伟哥，我谂同日本有《足球小将》卡通片有关，日本七、八十后畀戴志伟洗脑，洗到足球突飞猛进，内地就只有灰太郎，但无中华足球小将，所以踢下踢下踢返转头罗。

大家讲开煎面，香港酒楼一般系用油炸，边有咁得闲同你煎到两面黄，然后中间还有一个软腍腍之面心，点解咁是但求其？因为无日本人之执着讲究，香港系醒目仔文化，最紧要快手快脚搞掂，赚到钱就系叻仔，唔好封个煎面达人，或者煎面大王个朵畀我。呢家茶楼个老板系张翁老友，所以煎面唔会偷工减料，真系好用心帮你慢慢煎，呢啲系口福，可遇不可求。

老板行过，听到大家咁赞赏，即时笑晒口。「去日本好玩呀，不过听老友去完返嚟讲，日本打卡地点、购物必去处，好似小香港咁，成街都系大大声港式广东话。」我唔想扫银行伟兴，于是又将话题带到去另一边。「讲开又讲，你话做平民百姓几好，去到边都无人知你系边个，大大声周街嘈无问题，食嘢食得土豪，亦唔会有人喺你背后批评，所以我好感恩自己唔系英国皇室人员。」

大师兄话做中东王子都OK，不过做到英国王子就差好远。「系罗，嗰位英国二王子同屋企唔妥，佢自己好有骨气唔黐皇室金糠，搬去美国住，点知原来无钱度日。」最凄凉系想打电话畀老爸求助，呢位老爸竟然唔接电话，大家只可以电邮沟通。

「系噃，英皇查理斯三世同传媒爆料，话二王子成日问佢攞钱，你当我开银行？于是同佢割席咁话。」我心谂，呢位父皇都几坦白，原来做皇帝唔系好似银行家咁叠水，即系穷啦，无钱又无权，但日日要你抛头露面，呢份工搵你去做，我喺中环打份牛工都不知几消遥，得闲去日本，平时可以同班老友饮茶或者饮酒。

「家家有本难念的经，你以为自己仲细咩，你仲生活在童话世界？醒下啦。」大师兄，关我乜事，我无羡慕过做王子，我只系想开开心心打工，交税唔使问银行借，如愿足矣。何况我老爸做皇帝都无能力照顾我，大时大节着到王子咁出场，都无几多出场费，仲有可能义务演出，算把啦，留畀你做大龙凤。

张翁话︰「做唔做王子唔到你拣嘅，你抽到支好筹咪做王子，最好当然系石油大国之贵族，不过，睇你好彩唔好彩。」如果有得拣，我最想做足球超级明星，我就唔多羡慕C朗，踢波踢到头筋都现。「我都咁话，最好做美斯（见图），成场行下行下，当散步兼养生，有波传过嚟先至踢两脚，行下行下赚到亿亿声美金，真系好过做王子。「错，系好过做皇帝，你睇下查理斯近排几躁底，行出街仲要惊畀人掷鸡蛋，大佬，我欠咗你哋咩。」

好啦，食完去开工，迟啲我都放假。