李辰安 - 美麗劇好現象｜辰來之筆

有部美麗劇集重燃大家對肥皂劇的興趣，網上新聞、社交平台日日講邊個邊個又點點，我覺得香港氣氛返晒嚟。

細細個睇阿姐、秋官做戲，成家同一時段目瞪口呆望住個電視，都係想追今集呢個女強人又會有乜遭遇，嗰個大家族就快變成點，一家人一條心，閒話少說，睇劇最緊要。然後，廣告時間，阿媽執碗碟入廚房，阿爸去洗手間，或者睇下個Call機頭先邊個搵佢，我就多數紋風不動，詐詐諦諦坐定定，唔好引人注意，費事又叫我返入房做功課，無功課做就搵啲數學題計下數。阿媽喺廚房急急腳行出嚟，除咗掛住睇阿姐之外，如果心血來潮見到我又學人睇電視，一定又係嗰句︰「讀書唔見你咁勤力，考試唔考電視劇㗎，仲唔去溫書。」當然，如果電視已經去完廣告，第二場戲已經播緊之時，阿媽就無你咁好氣。

「世侄，乜你都係電視精呀，你都幾八卦噃。」是日中環黃昏酒聚，大家憧憬好快全面通關，可以去澳門食懷舊葡國菜，再上珠海、中山、佛山自駕遊，忽然扭咗過去電視劇個Channel，好似有少少九唔搭八，不過，德高望重之張翁問到，我點都要答一答。「張翁，我唔係八卦，而係當阿姐同秋官係通俗社會學導師，教我入大學讀社會科學院之前，明解一下中國傳統與現代之家族意識同觀念，又可以講話係課外通識教育，見識大公司點樣開會，董事同董事長之間如何溝通。」

你知啦，阿媽只係識得叫我做功課，平日對我之教導和指引，可以話無乜養分，佢點夠阿姐咁有內涵呢？當然，我無講到出口，講完電視之社會功能就點到即止。「李生，我同我老竇最親子時間就係一齊睇波，大家和諧共處，有傾有講，好快到世界盃，我打算放大假，一家人整整齊齊在家中，收睇臨尾幾場重要賽事。」咦，靚仔侍應碧咸仔個媽媽都係球迷？「唔係，不過會幫手煲糖水，睇完大家食。」

銀行偉就提提我，如果秋官又出現在公仔箱，記得話佢知，因為次次佢出嚟，股市大跌，依家歐洲局勢不妙，世界經濟衰退，失驚無神爆鑊世紀股災點算？所以密切留意秋官動向。「偉哥，你分分鐘上落幾十萬，辛苦你啦，返屋企睇下劇可以減壓，咪見到秋官就咁驚。」今日好涼好爽，依家都無乜大新聞，德國都話儲夠天然氣，這個聖誕節可以普世同歡，講開又講，大家唔怕凍就飲大杯德國啤酒啦。

大師兄對啱啱播完嗰部《美麗戰場》（見圖）好欣賞，佢猛彈坊間之言論︰「唔識睇劇就話呢部係爛尾劇，真係九唔搭八。」係囉，成套劇不知幾有層次，有層次得嚟又好曲折離奇，爛乜嘢尾？故事要有完整交代，不留觀眾一點想像空間就係叫「師奶劇」，我都要講句，你哋九唔搭八，睇粵話長片啦。當然，我唔係話粵話長片唔精采，或者唔進步，只係想講，今次個劇本屬於幾前衞，你要多角度欣賞。

「世侄，都話咗你夠八卦，今次套劇點睇呀？」張翁，我唔係八卦，而係套劇好有凝聚觀眾之能力，第二樣唔好話，講我公司個會計妹，之前同男朋友失去共同興趣，又覺得大家追求嘅世界不一樣，好想同男友分手，不過，一套美麗劇集，會計妹變咗劇迷，日日同男友講劇情，分析三個女主角之不同心理人格，講下講下，兩個變成好朋友，依家仲係糖黐豆，乜鬼風波都變成過去。

「安仔，公仔箱最大功能咪就係打破人與人之疏離囉，你講社會科學都知啦，如果無一個共同故事，一個部落都好難聚合成一個有效組織。」大師兄，不如飲杯先啦，講呢啲，大家幾十年前喺鄉下大學校園未講夠咩，講到咁離題，服咗你。

「其實，好多師奶唔習慣一個角色有如此豐富之人格光譜，以為一定係好人好到尾，衰人就衰收尾，其實一般人有九重性格。」大師兄打斷，仲插咗一句︰「千幾年前，中國古籍記載人有十二重嘅性格，我同你Update下。」

係囉，人有十幾重性格，點會一個模去到結局。

聽講美麗劇會有續集，好嘢，香港劇精采即係代表香港創意又返來，大家飲杯。「偉哥，唔好諗住個市，開心下啦。」