李辰安 - 美丽剧好现象｜辰来之笔

有部美丽剧集重燃大家对肥皂剧的兴趣，网上新闻、社交平台日日讲边个边个又点点，我觉得香港气氛返晒嚟。

细细个睇阿姐、秋官做戏，成家同一时段目瞪口呆望住个电视，都系想追今集呢个女强人又会有乜遭遇，嗰个大家族就快变成点，一家人一条心，闲话少说，睇剧最紧要。然后，广告时间，阿妈执碗碟入厨房，阿爸去洗手间，或者睇下个Call机头先边个搵佢，我就多数纹风不动，诈诈谛谛坐定定，唔好引人注意，费事又叫我返入房做功课，无功课做就搵啲数学题计下数。阿妈喺厨房急急脚行出嚟，除咗挂住睇阿姐之外，如果心血来潮见到我又学人睇电视，一定又系嗰句︰「读书唔见你咁勤力，考试唔考电视剧㗎，仲唔去温书。」当然，如果电视已经去完广告，第二场戏已经播紧之时，阿妈就无你咁好气。

「世侄，乜你都系电视精呀，你都几八卦噃。」是日中环黄昏酒聚，大家憧憬好快全面通关，可以去澳门食怀旧葡国菜，再上珠海、中山、佛山自驾游，忽然扭咗过去电视剧个Channel，好似有少少九唔搭八，不过，德高望重之张翁问到，我点都要答一答。「张翁，我唔系八卦，而系当阿姐同秋官系通俗社会学导师，教我入大学读社会科学院之前，明解一下中国传统与现代之家族意识同观念，又可以讲话系课外通识教育，见识大公司点样开会，董事同董事长之间如何沟通。」

你知啦，阿妈只系识得叫我做功课，平日对我之教导和指引，可以话无乜养分，佢点够阿姐咁有内涵呢？当然，我无讲到出口，讲完电视之社会功能就点到即止。「李生，我同我老窦最亲子时间就系一齐睇波，大家和谐共处，有倾有讲，好快到世界杯，我打算放大假，一家人整整齐齐在家中，收睇临尾几场重要赛事。」咦，靓仔侍应碧咸仔个妈妈都系球迷？「唔系，不过会帮手煲糖水，睇完大家食。」

银行伟就提提我，如果秋官又出现在公仔箱，记得话佢知，因为次次佢出嚟，股市大跌，依家欧洲局势不妙，世界经济衰退，失惊无神爆镬世纪股灾点算？所以密切留意秋官动向。「伟哥，你分分钟上落几十万，辛苦你啦，返屋企睇下剧可以减压，咪见到秋官就咁惊。」今日好凉好爽，依家都无乜大新闻，德国都话储够天然气，这个圣诞节可以普世同欢，讲开又讲，大家唔怕冻就饮大杯德国啤酒啦。

大师兄对啱啱播完嗰部《美丽战场》（见图）好欣赏，佢猛弹坊间之言论︰「唔识睇剧就话呢部系烂尾剧，真系九唔搭八。」系罗，成套剧不知几有层次，有层次得嚟又好曲折离奇，烂乜嘢尾？故事要有完整交代，不留观众一点想像空间就系叫「师奶剧」，我都要讲句，你哋九唔搭八，睇粤话长片啦。当然，我唔系话粤话长片唔精采，或者唔进步，只系想讲，今次个剧本属于几前衞，你要多角度欣赏。

「世侄，都话咗你够八卦，今次套剧点睇呀？」张翁，我唔系八卦，而系套剧好有凝聚观众之能力，第二样唔好话，讲我公司个会计妹，之前同男朋友失去共同兴趣，又觉得大家追求嘅世界不一样，好想同男友分手，不过，一套美丽剧集，会计妹变咗剧迷，日日同男友讲剧情，分析三个女主角之不同心理人格，讲下讲下，两个变成好朋友，依家仲系糖黐豆，乜鬼风波都变成过去。

「安仔，公仔箱最大功能咪就系打破人与人之疏离罗，你讲社会科学都知啦，如果无一个共同故事，一个部落都好难聚合成一个有效组织。」大师兄，不如饮杯先啦，讲呢啲，大家几十年前喺乡下大学校园未讲够咩，讲到咁离题，服咗你。

「其实，好多师奶唔习惯一个角色有如此丰富之人格光谱，以为一定系好人好到尾，衰人就衰收尾，其实一般人有九重性格。」大师兄打断，仲插咗一句︰「千几年前，中国古籍记载人有十二重嘅性格，我同你Update下。」

系罗，人有十几重性格，点会一个模去到结局。

听讲美丽剧会有续集，好嘢，香港剧精采即系代表香港创意又返来，大家饮杯。「伟哥，唔好谂住个市，开心下啦。」