李辰安 - 深圳河變泰晤士河｜辰來之筆

我都話未嚟得切買花生，呢場「英超」賽事已經吹雞完場，話咁快又換個第二場，世界之事真係好奇妙。

大家又在中環黃昏作無所事事之酒聚，聽我講「英超」，靚仔侍應碧咸仔行埋嚟問︰「李生，你講邊場賽事，我好似無留意噃。」大師兄獨自一人飲啤酒，有無搞錯，天氣都轉涼，仲飲啤酒，還加把口同碧咸仔講︰「佢周時九唔搭八，聽佢發噏風，係浪費青春。」

張翁話︰「又唔好咁講，世侄梗係講嘢有骨，你估真係睇英超咩。」銀行偉今次好醒︰「辰哥唔通想講英國首相之爭？」醒即係醒，好多人唔識避忌最新一輪英相更替，唔係大選，因為無選舉，好似今屆香港特區行政長官一樣，係眾望所歸，唔使咁多投票手續，你話英國無問題，香港亦都係無問題，千祈唔好話英國首相無代表性，又無民意基礎，更加唔係夾硬嚟。

「安仔，唔好再講啦，維園都無檔擺，你慳番啖氣講古好過，係嘞，最近有無寫小說？」講呢啲，我想講「英超」賽事正就係唐寧街十號之爭，估你唔到係我想睇鐵娘子翻版卓慧思幾時翻艇，殊不知，花生都未嚟得切買，就換咗畫，依家坐低要睇係辛偉誠（見圖）擔綱演出，正所謂如果你咁啱行出去便利店買花生，返來已經踢第二場。

「你點睇呢位印度裔英國首相？」恕我直言，用一個不太適合，但又幾抵死之比喻形容，就好似特區忽然由喬寶寶出任行政首長咁樣。「安仔，你真係九唔搭八，真係唔知你想表達乜嘢？」我心諗，你都話維園論壇收咗檔啦，大家吹水，當然天馬行空，我一定唔會講出聲，大家酒聚係成個禮拜最開心時間，大家唔好拗，拗嚟做乜啫，人哋夠話搵劉天王做特首啦，今次如果我話獎門人都有意角逐下屆首長，又得唔得？

「大家不如開支法國紅酒啦，秋涼好合時令。」其實，政治就係一台戲，大家當睇Show，如果講到青筋暴現，又何必呢？「不如大家估下辛偉誠可以做幾耐啦。」嗱，唔係我講，銀行偉發謬論咋。「偉哥，你想買邊個係下個莊？肥波唔會咁快翻兜？」

呢支法國紅酒都算係浪得虛名，酒身薄弱，好似差啲噃，唉，算啦，兩百蚊，你想點？早知要葡萄牙氣酒好過，不過，好似唔啱張翁心水，因為太甜，你知啦，老人家最怕糖，身體緊要，飲到一百幾歲就最好。

講起肥波，有人話佢似梁醒波，正宗喜劇之王，大家點睇？「肥波前首相唔通佢似李奇呀，你比喻九唔搭八。」大師兄，咁都畀你鬧，你近排炒燶股票咩，咁躁底。係噃，都似啦，深秋天時都猛咁飲冰凍啤酒，我都諒解你嘅處境，如果你真係有玩股票，好似我咁，無炒股，躺着都中槍，因為強積金已經唔見咗好多錢，一講把幾火，早知唔飲呢支淡淡地之法國紅酒，我不如都學你飲冰凍啤酒。

梁醒波演喜劇，最叻係詐儍扮懵，成個人遊魂咁，忽然無厘頭，然後噏三噏四，帶人遊花園。「世侄，你嘅比喻又幾精警，肥波就係一個喜劇首相，沒有之一，你估佢今天留力唔跑，讓位予辛偉誠，是否有後着？」我就唔評論啦，費事有人話我喺不適合場地講唔適合之話題，我都係講生活話題。

「係啦，香港會加電費，嚇到我個心離一離，以為俄羅斯斷油影響埋我哋。」聽講英國人要去埃及度假避冬，因為留在英國，要畀好貴電費同天然氣費用。「不過，你做超級市場就無得咁瀟灑，除非你可以遙距工作，又或者係老闆啦，仲要係大老闆嗰隻至得。」聽講好多留英香港學生都會返來，我其實提議，不如英國大學來港辦學好過啦。「世侄，邊有咁多地畀你開學校，香港租貴吖嘛。」

無問題，可以去大灣區，開多幾家英國學校都唔怕無生意，英國老師可以在大灣區享受暖氣，又有溫泉、高爾夫球場，有得諗。

「係噃，世侄，大家去英國讀書都係買佢品牌，但唔一定飛去原產地讀書，好似德國名牌車、美國電動車都係中國生產，大家慳啲，一家便宜幾家着，好提議。」大師兄嘴藐藐咁話︰「去微縮景區辦英國學校啦，有條山寨泰晤士河咪幾好。」

我都費事睬佢，一於轉飲啤酒，醒下先。