網絡熱話｜冰島馬幫你覆email? 原來係旅遊局最新度觀光行銷策略

2022-09-20 00:00

非正式統計，全球超過41%人在度假時，每日會覆1至4次公司email，近15%仲會check超過5次。大家旅行時都要掛住工作嗎？冰島旅遊局希望大家出遊時要輕輕鬆鬆度假，因此想出了別開生面的旅遊計劃「OutHorse Your Email」，讓冰島馬可為正在開開心心放假的大家效勞，幫你回覆工作email，一於digital detox認真放假！

潛緊水要覆email？

浸溫泉、打緊卡要覆email？

冰島馬究竟點樣覆email？
冰島旅遊局特地請來3隻冰島馬，仲好認真地設立官網，對3隻冰島馬有簡單介紹。分別係「打字好快，但可能會瞌眼瞓」的Litla Stjarna Frá，「走偶像派路線」的白馬Hrímnir Frá Hvammi，仲有「聲稱受過公司培訓」的勤力馬Hekla Frá Þorkellshóli。3位「馬同事」各有所長，究竟點幫大家覆email？旅遊局特地製作了適合馬隻打字（即係踩字喇！）的鍵盤，將特大鍵盤放在不同的冰島觀光景點，「馬同事」一邊在山間、湖邊吃草，一邊覆email，真係又chill又勤力喎！

幽默手法介紹旅遊
搞場大龍鳳做場無聊事，「馬同事」覆email一事在IG、Facebook成了熱話。事實這是冰島旅遊局最新的觀光行銷策略。在大家去「馬同事」官網的同時，可透過短片，睇到馬隻如何覆email之餘，仲直接睇埋冰島大山大水、獨一無二的絕景風光。點先得到冰島馬覆email？入官網輸入名字、日期及電郵地址，「馬同事」好快會幫你辦妥。大家有冇興趣試下？