疫情減壓｜秋季3大戶外活動推介 行路都可以救野生動物 農田玩泥漿摔角？

香港人生活壓力好大，供樓供車又要照顧家庭，加上近年要對抗新冠疫情，身心都感到有啲疲累。所以小編建議大家要適時放鬆，以下幾項正接受報名的活動，就可讓大家放鬆心情，減碳做下運動，甚至同小朋友瘋狂落田玩一天嘅競技。其實身心健康，先至係抗疫嘅良方呢！

香草工作坊教自製香草鹽

體驗坊以香草作為主題

由嘉道理農場管理嘅綠匯學院，最近推出一個幾得意嘅工作坊，叫做「香草。慢活 」。呢個體驗坊以香草作為主題，兩小時嘅活動能讓參加者响舊大埔警署呢個咁幽美嘅古蹟環境下，放慢步伐，感受一下自然環境之中的香草氣味，探索香草嘅特性、培植、配搭與應用。最後會用香草嚟製作製作出香草鹽與香草小盆栽。

「香草。慢活 」體驗坊
日期：星期一至六 (逢星期二休館)
時間︰ 10:00 - 12:00 或 14:00-16:00
地點：綠匯學苑 (新界大埔運頭角里11 號)
人數：15-23人
費用：每位$200 (大小同價)、每位$150 (政府註冊全日制學校及已註冊慈善團體優惠價)
詳情：www.greenhub.hk/tc/group-event/Group-ExperienceHerbRetreat

「萬」步籌款換玻璃底船飛

萬步9月

如果想切實地郁動下，但又怕太辛苦，以下介紹嘅「萬」步籌款可能好啱你。由香港世界自然基金會香港分會所舉辦嘅最新一項籌款活動「萬步9月」已展開，參加者只要响9月內儲夠一萬步的行路「里數」，就叫達成目標了，然後將步行紀錄截圖及上載到活動網站就可以。成功完成挑戰者將於10月12日前，透過電郵通知獲取完成禮品，禮品方面分兩種，如參加個人挑戰($100捐款組)，將可獲紀念證書及WWF紀念襟針，個人挑戰($250捐款組)除證書及襟針可額外獲海下灣玻璃底船之旅門票一張，如參加團體/家庭組(最多6 位參賽者)，只要付出$450捐款報名，完成挑戰後便可獲證書、襟針及海下灣玻璃底船之旅門票兩張。
今次嘅籌款活動主要是支持WWF在香港進行野生動物之研究及保育工作，主力研究嘅本地物種包括馬蹄蟹、歐亞水獺、黑臉琵鷺、中華白海豚、穿山甲等。事不宜遲啦，今日開始就去散步，「萬」步後花園吧。

「萬步9月」籌款活動
日期︰9月1日至9月30日
時間︰任何時間
地點︰任何地方
組別︰分個人組及團體/家庭組
費用︰$100、$250、$450
查詢：www.wwf.org.hk/events

水田運動會泥濘中彈跳飛奔

水田運動會

如果喜歡競技項目，除咗參加跑步比賽之外，以下呢個別出心裁嘅活動應該好適合你，由香港觀鳥會及長春社一齊舉辦嘅「水田運動會」正式招募，召集大家去到河上鄉落田，嗱.......就唔係叫你耕田，今次係玩泥漿啫，暫時所知項目都係圍繞「耕田肌」的肌力、耐力同爆發力嚟設計，需要參加者唔怕污糟，响泥濘中行走、奔跑甚至係彈跳，與隊友一齊合作，所以亦會考驗你哋嘅策略性同埋默契。
大會只係透露咗咁多資訊，不妨自己親自去試玩下，瘋狂一下，唔好俾自己坐响屋企咁悶。

水田運動會
日期︰10月8日（六）
時間︰9:30-13:00
地點︰上水河上鄉
組別︰成人組18-55歲、親子組1位成人及6-12歲小童 (比賽形式為隊制賽，須以兩人一組報名參與)
費用︰會員$420/組、非會員 $500/組
查詢：www.facebook.com/hkbws

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ