李辰安 - 打工皇帝係邊個？｜辰來之筆

疫情之下，看到一則勵志新聞，原來你夠努力，逆市之下人工唔會減，仲可以加到破紀錄，聽見都開心。

今朝一早畀大師兄個信息驚動，重點唔係下午去邊度飲茶，而係香港有位打工皇帝，去年加薪超過一成半，計起上嚟一千六百萬元一個月，若以工作八小時一天計，一分鐘搵一千一百一十一元。

我成日驚4月公司有大動作，減人又減薪，好在老闆都無咁絕情，大家無人工加，人手自然流失就算。講老實，我唔覺得有幾驚喜，事關好多年都無人工加，疫情之下又如何，我無買支紅酒賀下佢之心情，反正做得一日得一日，無得做就返大灣區生活，嗰邊有好多香港影視紅星過咗去，大家生活唔會有改變。

見到打工皇帝收入破紀錄，我就有少許動容，因為年輕時發夢做青年才俊，人家問︰「點先至係青年才俊？」我當時答案好簡單，四十歲以下，年入一千萬元就係嘞。回想三幾個十年，你一年唔搵得十個一千萬，真係唔好同人講你係成功人士，真正封王的話，新標準係一千一百一十一元一分鐘。

何解我會感到興奮？關我乜事，日薪一千一百一十一元喺今日嚟講便是筍工，你想點？我想是回到當年畢業有幻想之時，打工皇帝當年都未上榜，香港主要最高收入人士係洋人！估你唔到，今時今日由華裔人士奪冠，你話係咪好事。

又到食飯時間，張翁首先到，我同佢兩個人坐低，吹下水，吹到每分鐘賺一千一百一十一元之花邊新聞，佢老人家慢慢品嘗一下鐵觀音，好有感慨話︰「我都幾十歲，搵幾多我無乜所謂，最緊要身體好。」我點頭同意︰「係嘞，有健康仲要全世界無瘟疫至好噃，如果唔係大家點去旅行？張翁你想去邊度玩？」

話口未完，大師兄與銀行偉出現在隔離枱，銀行偉起身過來答話︰「睇電視見到靚姨姨介紹北國風光，冰天雪地幾好情趣，我想去玩下。」我心諗，歐洲依家局勢唔多穩定，能源、糧食分分鐘有問題，仲有你講嗰啲北國風光，同俄羅斯是否有邊境接壤呢？大家要小心至好。

「安仔，你都九唔搭八，偉哥咁好心情，你就焚琴煮鶴，不如你幫大家叫啲點心食先啦。」大師兄，我就建議都係保守少少，去日本算啦，再唔係去澳洲行下，相信幾穩陣。「講開又講，依家分分鐘上落十幾萬都無用，成個世界好似愈來愈侷促，有錢又點？不如捐去有需要國家啦。」係噃，香港有年輕名人搞網上捐款畀某歐洲苦難國家，一晚有十幾二十萬咁話。

施比受更有福，唔知點解，經過今次新冠大流行，再加上一場歐洲軍事衝突，好多人變得更加佛系，好似睇得好開，正所謂去返港姐之心頭願望︰「世界和平」，以前聽落以為幾好笑，今日覺得好有深度。

大家都係叫蝦餃、燒賣，最好加碟腸粉，食住先，等陣睇下老闆有乜好介紹。「香港後生仔最勵志唔係搵一千幾百萬一個月，而係月入三萬，有層三百方呎住宅，每三個月可以自由轉換工作環境。」係咩，好似聽過，後生仔眼界同我呢一輩好唔同，老實講，唔係租又唔使供樓，月入三萬幾OK，最緊要係自由人，唔係跟住一個老闆搵食，最好係有如日本浪人武士，隨時隨地做自己認為啱做之事。

「辰哥，點解後生仔唔想月入十三萬，住一千三百方呎住宅，自己做老闆？」真係問得好，後生仔創業會更加自由，不過，你知啦，創業好多時係一份二十四小時之工作，等如剝奪一個人之大半人生，你當打之年日夜咁做，當你好成功又點？你無辦法可以中途開放。於是者，到有一日你想休息之時，你已經一把年紀了。

係噃，我應該明白打工皇帝只係筍工之一，而不是代表全部，如果今日我還年輕，我都有可能幻想月入三萬，住三百方呎，過自由工作之生活。人唔怕Hea，最怕你無夢想，搵銀唔係衡量幸福之唯一標準，其實，我喺中環返工多年，都好想轉變一下，倒如去海邊餐廳做月入三萬之咖啡師，然後可以去澳門做葡國菜，然後返大灣區拍下視頻做網紅，搞下搞下，有時間就去日本玩幾日，呢種生活先至係生活。

「世侄，你想多咗，飲啖茶消下滯啦。」張翁，大家咁話，身體健康！