李辰安 - 春暖花開 最好返鄉下｜辰來之筆

全世界都好似要跟新冠講Bye Bye，去到茶樓見到老闆過嚟招呼大家，頭一句問︰「幾時Plan去日本遊？」

春暖花開，此刻香港又正式宣布開啟新一章，大家心情很好，不過，大師兄問我︰「開啟乜嘢新一章？咪又係咁啫。」我心諗，係人都知我講乜啦，你係要抬槓，唔通我同你拗咩。「世侄，不如講下你有乜新春大計，例如幾時去大灣區睇樓盤。」

我剛剛自己坐低，想叫籠四寶雞扎，忽然覺得大家好似當疫情已過，病毒好似識跟人走咁……跟邊個人走呀？嗱，唔好句句將到我實，好無癮呀，大師兄，你不如都係食個叉燒包先。張翁，依家內地都係打仗咁，幾時順利通關，恢復以前唔使隔離，不知要等到幾時。「係，不過，香港係國際都會，應該好快同國際接軌，而世界各地都當新冠係流行性感冒，你去日本就OK，去新加坡都得。」

老闆又好風騷咁行過嚟︰「點呀，各位好朋友，不如蒸條魚啦。」唔使咁大龍鳳，下次先啦，不如整個斑腩煎米粉。「講時講，呢個暑假可以去日本自駕遊，你睇有冇問題？」老闆，我又唔係話事人，又唔係玄學大師，我又點會識答你呢個敏感問題，不如同我哋寫多個炒時菜，簡簡單單，咁就Very Good嘞。

銀行偉最後一個到，早排港股好燶，依家日日反彈，連個樓市都好似有反應，相信佢又返去分分鐘上落幾十萬之忙碌日子，恭喜晒。「嘩，幾乎唔記得約大家飲茶，今日真係好忙。」我溫馨提示一下，依家仲係二人限聚，唔該你唔好行過嚟，坐去隔離位先，剛才我都係博大霧坐近去同張翁、大師兄傾幾句。

「偉仔，今日有乜心水投資筍盤？」張翁話，大家可以側側膊唔多覺，總之二對二飲茶傾偈，等陣個斑腩煎米粉叫老闆同大家分上。

食到離行離列，都算係我咁大個仔第一次之經歷，不過，大家都慣啦，反而一桌十個八個人可能會唔適應。「有人話香港有幾百萬人中咗，我都唔知仲使驚乜嘢，美國、英國可以唔使戴口罩，日本、新加坡、澳洲、紐西蘭同埋好多北歐國家都當無事，如此這般，不如就當係曼德拉效應，第二朝大家起身，問一句︰吓，有大流行咩？冇噃，好似，你有冇記錯？」對，呢個世界好在有曼德拉，選擇刪除記憶係好聰明之方法，嘟一聲，呢個世界就會無事，大家又何必太過在意。「安仔，你幾時開筆寫個《新冠曼德拉事件》故事，依家好有場景氣氛，唔好再左思右想，日日浪費時間。」

其實踏入2022年，進入虎年開始到今天，所有日子大家都唔想記得，好想好想有個掣一撳，記憶馬上煙消雲散，係咪？「辰哥，睇好多評論，再過兩個零月就有好日子過，係咪呢？」我望下大師兄有乜反應，佢食緊叉燒包，好專心咁食。於是我回應銀行偉︰「我不如幫你買本虎年運程，睇下今個農曆七月係唔係會雨過天青，烏雲盡散好過啦，我唔識答你噃。」

好嘞，老闆幫大家分好個煎米粉，四個人一人一碗，啱啱好，大家食嘢先，唔好又講啲咁鬼悶之話題。「係嘞，偉哥你日日上落一億幾千萬，呢排賺唔少，幾時去日本旅行？」大師兄隔枱呼應，佢話日本好多好嘢食，如果有人組團，一定報名。「世侄，日本真係好想開放旅遊，呢幾年真係好難捱，聽講好多日本名店都摺埋，如果第二日去到日本，你可能會摸門釘。」其實中環都係啦，都唔使講九龍尖沙嘴嗰條彌敦道，唉，見到都心煩。

老闆又行過嚟，佢想去日本買樓，因為上網見到好多視頻介紹日本有好多筍盤。「老闆，日本唔係我杯茶，我識嘅朋友一係移民去英國，一係過去台灣找尋小確幸，而我就好想返大灣區置業。」

日本話好難學，我唔識，你教我都唔曉，去玩幾日無問題，走過去住？人哋未必歡迎香港人，因為日本人講嘢陰聲細氣，我哋講嘢就中氣十足。「周潤發扮演村長嗰套戲有句名言，我講嘢大聲唔代表我無禮貌，不過外邊唔係好多人會欣賞香港人之禮貌，我唔會當日本係鄉下囉。」

返大灣區就同聲同氣，事關依家好多香港人過咗去，所以大大聲講香港話，無問題。好啦，望下隻表，三點啦，我要返Office了。