专栏│「新魔兽」变得欺善怕恶？

今个星期踏入国际赛期，睇一睇德国份名单无乜惊喜，加上又早早出咗线，不如继续讲下车路士今季大家都觉得佢进步咗嘅尼高拉斯积逊。

今季尼高拉斯积逊嘅入球率的确唔错，先从预期入球值（xG）睇，上季xG有18.6，只系入得14球，而今季xG达6.23，就啱啱好入到6球，以呢个指标嘅埋门能力可以话有进步，今季有两至3个入波都系望到佢嘅埋门触觉，包括对韦斯咸同利物浦嘅走身后突破对方防线，再把握单刀射入。

不过积逊依然未有改变战局嘅能力，当缺乏供应嘅时候，就会觉得佢消失咗咁，今季佢主力加强支点能力，季初对住弱队嘅时候，经常可以弹一脚就立即走身后，但喺护波方面，对住利物浦同埋阿仙奴等强队嘅时候，就会呈现不稳，因为佢经常被对方中坚中断同中场夹击而失去控球权，背身能力不足仍然系佢要改善嘅地方。

「新魔兽」要成为英超闻风丧胆嘅前锋，仲系有一段距离，唔可以只靠速度搵食，往后遇上强强对碰，都系时候要把握机会证明多啲自己。Willhappy