专栏│占士以身作则责无旁贷

列斯占士上周联赛1:2败予利物浦一役终于复出，但被领队马列斯卡要求尽快展示领导力，外人睇落好似有啲太苛刻，不过我认为作为队长嘅占士，要尽快回复状态并以身作则。

占士喺上季嘅下半季一直处于养伤状态，季尾先复出两场，不过8月热身赛后又伤过，搞到要喺上个礼拜先正式复出。作为车路士球迷，近年占士因伤缺阵已经习惯晒。而顶替佢踢右闸嘅马路古斯图不知不觉变得成熟，所以占士嘅复出有时反而会令部分球迷缺乏信心，惊佢一伤再伤又要长唞。

不过，一位健康占士具备防守效率加身体条件，同埋佢既可胜任内切翼卫又可在边路叠瓦助攻，有级数又有不同可塑性，现今球坛实在稀有。而且作为阵中极少数嘅自家青训，一路睇住佢从边路胡乱传中成长到攻守兼备，更加令球迷欣慰。要喺车路士近年不稳嘅防线中搵一个可以倚赖嘅重心，队长占士复出的确有能力稳定军心。

所以，马列斯卡期望队长占士表现出更大嘅领导力，呢个系合理嘅要求，尤其今季有时都要靠罗拔山齐士上身神救，就知道防线问题有几严重。当球队受压时，如果占士嘅坐镇可以令队友放心付托，话唔定进攻端亦可以发挥得更加淋漓尽致。Willhappy