专栏│板凳高质可助车路士夺冠

车路士等紧第一个冠军，其实只系等紧两年内嘅第一个冠军，上届联赛杯失利，睇嚟今次唔会再发生啦！车路士球员适应马利斯卡嘅阵式，组织非常流畅，数数下车路士已经3胜1和1负，战绩非常唔错，咁点解今季咁有信心车路士可以攞到一个冠军？

最关键系板凳深度，当去到季中好多球员会无力，加上现今赛程要应付咁多场赛事，每名球员场均都要踢50场，板凳上可换出嚟嘅人就系最关键。车路士后备嘅四人攻击线，尼干古、柏度尼图、梅迪历及祖奥菲历斯，几位都唔系一般球队可以拥有嘅球员，每当球员需要轮换嘅时候，佢哋都非常可靠。

联赛杯对巴罗，尼干古帽子戏法证明咗车路士嘅后备球员系非常之高质素，如果去到季尾有咩球员伤咗，佢哋可以随即代替，试问其他英超19队可唔可以有呢个板凳深度？

再加上季尾一定有啲球员会受伤，呢个系无可避免，如果可以唔需要适应而完全套用到阵式内，车路士睇嚟都系最有信心嗰一队。今届欧协联、联赛杯及足总杯应该都可以受惠于呢个板凳，不过冠军永远都要讲啲运数，但系睇嚟今年车路士终于可以修成正果啦。Willhappy