古天后日志｜内地降印花税 市场憧憬港股亦跟随
2023-08-28 11:03 
港股｜8月28日，短暂时间有阳光，有几阵骤雨，局部地区有雷暴。虽然鲍爷喺Jackson Hole嘅发言偏鹰，但美股上周反弹向好，标指回试4,300点见支持反弹，周五晚升0.67%，目前于4,400点附近徘徊；纳指更升近1%。目前VIX升至17点危险警界线就回，暂时美股唔似有大跌风险。
虽然美股喺8月初被评级机构下调评级，美债及美股均见有沽压，10年期债息一度高见4.36%，不过今次债息上升跟通胀预期无乜关系，反而系短线资金炒作，喺Jackson Hole会议前炒高，开会前偷步食糊。预期息口走势喺10年跟2年息差倒挂85点子情况下，反映明年减息1厘，跟预期吻合。
鲍爷讲话偏鹰，表示美国GDP较预期强劲，令年经济及通胀降温不似预期，并强暗示「有需要」时会再度加息，其实讲嚟讲去佢口风都无乜点变，6月时已暗示过下半年或会加息两次，7月加咗一次后，即系今年底前仲有机会加多次。债息上升另一个原因系美国赤字并唔乐观，由6月至今财政部已增发约9,600亿美元债券，巨大财赤令债券量供应增加，债价自然下跌拉动债息向上。
今早财经三大重点新闻：
财爷领导小组激活港股 业界提仿效美股「逐股买」 学者倡印花税降至0.1%
港股高开但难以高走
至于港股喺周五表现麻麻，反弹几日后周五又再回落至18,000点水平，成交更跌至813亿元，估计喺周三计结算，港股都唔弹得去边。虽然阿爷周日公布减免一半印花税，今日起实施，预计今日中港股市裂口高开，但唔好又畀古天后睇死，能够高开但难以高走，高开完升幅缩水系意料中事。不过市场或憧憬港股呢边会跟阿爷走，睇下波叔几时肯跟内地减印花税。
即使阿爷减半股市印花税，但外资早已一去无回头，单系今个月已再抛售超过480亿元A股，民间缺水情况未有改善，减低印花税唔等于会有更多资金入场。另一方面，债可敌国嘅恒大（3333）复牌，但同时阿爷救股市嘅组合拳，就包括限制A股股东减持，讲紧都系限A股，港股尚未有呢啲限制，恒大复牌难免又被抛售。
其实阿爷要救嘅并非股市，而系内地楼市，楼市继续爆雷，最终只会影响内银，不过畀恒大复牌，令到恒大仍有机会喺资本市场搵水鱼，若能成功集资抽水，有足够现金还息畀银行，咁内银就能避免出现大量呆坏幅，呢个系阿爷一直唔畀恒大倒下嘅用意，实在系保内银，因为恒大负债中有超过6,000亿元属于银行负债，恒大只要还到息畀银行，银行无事重要过恒大生死。
中港两地减低印花税能否救活股市，都系要睇外资会否重临，不过减咗印花税对成交始终会有帮助，至少短炒客同高频交易可以生存，搞返活个成交都好重要，交易成本太高，就算股份质素再好，都系拍乌蝇无生意，但交易成本下降嘅话，垃圾都有人短炒，至少营造到交投畅旺呢个景象，升升跌跌有得炒，总好过水清无鱼无人问。
相关文章：
港股开市｜中港出招救市 恒指高开562点 港交所升7% 恒大复牌泻逾8成
---
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应