古天后日志｜港股继续回调 仍于日线保力加通道内上落 难吸长线资金入场
2023-08-03 11:18 
港股｜8月3日，大致天晴，天气酷热，稍后局部地区有骤雨。美国被惠誉下调长期信用评级至AA+，美股借势下调，但相对其他股市，美股已算克制，道指跌348点，跌不足1%；标指跌1.3%或63点；纳指跌逾2%，跌310点。VIX升至16.48，已逼近17-18，即市场情绪扭转嘅分界线，一旦升穿呢个水平，要小心美股出现较大幅度调整，毕竟美股累计升唔少，目前估值上偏高。今晚轮到苹果公司公布业绩，市场都预咗Q2业绩都系一般，亦已消化iPhone收入下跌，问题系市场接唔接受30倍以上PE嘅苹果公司。
目前已有超过一半嘅标普500指数成份股公布咗业绩，超过八成公司超出预期，整体倒退率亦好过预期，反映美国经济维持强劲，并未有出现预期嘅衰退。而7月份小非农就业人数增加32万人，远超于预期嘅19万人，连续四个月超出预期。疫情后复常令出游人数大增，需求上升带动酒店、餐饮业扩张，休闲及酒店业新增职位再次表现强劲。
惠誉下调美债评级，令资金变得保守，美汇指数由99.5升回102.6，美元转强人民币由7.11回落至7.20，人仔又复转弱，中概股亦脚软，隔晚金龙指数跌逾4%，夜期跟ADR双双向下至19,400水平寻找支持。睇返呢几日中概股嘅走势，急升急跌，忍唔住高追又秒变韭菜，呢啲波幅根本难以令人买咗货可以安安乐乐咁坐定定，港股仍然系上落市，咁嘅走势，系好难吸引到长线资金入场。
港股目前估值偏低
虽然港股目前估值系偏低，但都吸引唔到长线资金入场，只系炒消息嘅短线资金喺场内弹出弹入，长期成交低迷。虽然上月底阿爷又话要救市，但又系打嘴炮呢一招，无奈真系无资金配合，亦唔见有具体政策出台，呢啲口水政策市嘅升势难以持久，港股仍然维持上落市格局。
个股方面，恒大系嘅股份，逐只排队复牌，似乎阿爷真系唔想恒大就咁仆街，银行继续借钱畀恒大，只要能够还到利息，银行自然唔需要将恒大嘅债务拨入坏帐，以债冚债虽未能做到，但见步行步先以息冚债，为恒大续命。恒大目前系中国甚至全球嘅最大债仔，单系拖欠供应商嘅债务已达一万亿元，黑心讲句，只要呢一万债主嘅供应商死一半，恒大变相债务减少5,000亿元，若然能成功复牌再透过喺市场上集资，当然系仲有傻仔肯落搭先抽到水，咁恒大就有机会死唔去。只要恒大死唔去，就唔会拖死埋内银。
港股由18,500点反弹至20,400水平回调，目前落到100日线及10日线附近，即19,400至19,500水平，若然呢个水平失守，大市有机会继续向下考验其他移动平均线，不过一旦能够守住全部平均线并作整固，后市仍有望再一次挑战日线保力加顶部突破向上，只系资金不足问题未解决，加上呢个星期一至星期三日线图出现嘅三枝阴烛令走势出现逆转，似乎港股都系难以走出喺保力加通道内上落嘅格局。
相关文章：
---
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应