星8卦｜犯众憎「爱姐」嫁错「失匙夹万」太子爷 陪契爷过夜换肉金养废老公
2023-01-13 10:00 
娱乐圈畸型现象一向多，有时真系会令你睇到O嘴，咁都得呀？
「爱姐」出身普通，一心谂住入娱乐圈抛个身出嚟搵快钱，佢唔系孝顺顾家，今时今日唔再系以前卖肉为家贫。你话爱姐屋企好穷，又唔系，做个平凡OL佢唔甘心啫，话佢贪慕虚荣比较贴题啲！参加比赛入行，被公司老板睇中，好快就献身即食，长期系酒店寻开心，不过，系人都知佢有条真正大水喉「灯哥」射住。
「灯哥」喺江湖有地位，虽然年纪大爱姐差唔多30年，但对爱姐情有独锺，司机靓车出入，仲有豪宅任住，为咗避人耳目，爱姐定时搬入灯哥靓屋住，仲高调搞埋上契仪式，但明眼人一睇就知，呢对契爷契女有唔寻常关系。大家顶爱姐唔顺，咪因为灯哥太纵，又学晒契爷啲霸道行为，圈内好多人唔妥佢，搞到佢无咩嘢做，哈，你以为爱姐死梗，原来佢趁呢段时间玩结婚，搵咗个失匙夹万太子爷埋街食井水，太子爷够傻仔，娶个明星老婆希望老窦觉得自己有成就，结婚几个月爱姐就好幸福咁话自己有咗，仲要三年抱两证明两公婆好恩爱喎。
太子爷当然继续「失匙」，不过生活反常咁富贵，无非系爱姐同老公讲，夫妻同心，做名人唔可以失礼，所以拎晒啲私己钱出嚟撑住门面，太子爷乐得成世人无所事事，由得爱姐养自己。事实系灯哥对爱姐有真感情，但屋企个老婆又唔可以抛弃，但又担心爱姐嘅将来，于是帮佢搵埋太子爷，然后个个月俾大笔家用爱姐养家，搭一个靓棚，等爱姐人前人后够晒面子，条件系佢唔准离婚，否则断水断粮。爱姐所以婚后扮无事业心，好安份咁做归家娘，好彩太子爷除咗废，仲有七分外貌身材，又听话顾家。
灯哥就一个月要爱姐陪自己过一次夜，至于点呃太子爷放人就系爱姐最大嘅考题，爱姐梗系要谂方法应酬真正嘅大老细，所以最近又高调出嚟做嘢，同助手扮好忙，其实系灯哥要见佢，就要即时交人，睇吓几时太子爷知道真相，肯唔肯继续戴呢顶绿帽！
【相关文章】：
最新回应