独家丨肥妈卷入张伟文「惨不忍睹」事件狂呻无辜：用吓个脑啦，我点会咁话佢呀?

2022-09-15 07:00

《星岛头条》日前独家报道有位好有「份量」，又声大大嘅女歌手睇完张伟文（Donald）演唱会后，指他身体差，坐住轮椅仲要推佢出嚟唱歌赚钱系惨不忍睹嘅事，搞到张伟文都好嬲猪。报道出街后，全城网民齐估女歌手是谁，因为一向讲嘢好有中气，肥妈成为头号嫌疑人物。肥妈向本报承认睇张伟文演唱会期间曾经叹气，佢愈讲愈劳气，「我系大大声啫，系咪？睇到喊有乜错呢？用吓个脑啦，我点会咁话佢呀？」张伟文经理人方俊听毕肥妈言论表现平静：「其实肥妈入后台为张伟文打气，做法比喊住走嚟得正面嘅。」采访：方骞平

肥妈成声大大女歌手头号嫌疑人物，佢大呻好无辜。

张伟文曾咬牙切齿，不满大大声女歌手阻他搵啖饭食。

方俊放生为张伟文祈福，好锡伟文。

方俊经常被误会系张伟文亲儿子。

69岁「靓声王」张伟文坚持要自强不息，唔想做废老，即使今年二月中咗新冠肺炎，康复后仍然卖命完成《友情有义演唱会》两场补场。对于演唱会后传出是非，他曾咬牙切齿反驳：「我剩番碗饭，碗饭对我嚟讲好宝贵，我得一、两份收入都唔放过我？」上周六中秋佳节，方俊喺老人院接咗张伟文出嚟热热闹闹过节，佢仲一口气吞下半个月饼，兼食到最爱的水晶梨，过咗一个快乐中秋。

方俊从老人院接走张伟文过中秋，齐齐食月饼。

张伟文喺方俊屋企食好西过节，睇佢几开心。

有碗饭食对张伟文好重要。

张伟文有方俊及方丽盈陪伴，又有歌仔唱就会好精灵。

心噏睇到喊半途离场

提到全城齐估声大大女歌手，网民矛头指向肥妈，她透过短讯接受《星岛头条》访问时就表示好无辜：「我都冇讲过，根本搵我嚟做新闻。」她又讲出事件来龙去脉，原来当日她和黑妹(李丽霞)去尖沙咀睇张伟文头场Show，一入后台就各自畀利是张伟文，然后就出台前睇Show：「见佢坐住轮椅出嚟唱歌时爆喊，同埋见佢睇住个电视机，都睇唔清楚啲歌词，我睇到咁就系咁喊，朋友话『你喊得咁紧要就行先啦。』所以我睇咗一半就行咗去喇。」肥妈表示，半场离开时听到有人话：「真系都几可怜，咁都仲叫佢出嚟做Show！」佢听毕就唉咗一声及回应咗句：「系罗！」肥妈再三强调原句一定唔系出自佢把口。

张伟文去年12月举行首场《友情有义演唱会》，当晚他爆喊多谢观众捧场。

张伟文首场个唱，肥妈及黑妹姐曾到后台探班，并畀利是支持。

城齐估声大大女歌手，网友估系肥妈。

我去捧场仲有畀利是

肥妈坦言觉得呢件事好心冇好报，「佢搵饭食关我乜事啫？我成日都支持佢，佢开演唱会我又做佢嘉宾，系咪呀？之前佢搬咗去内地，又系我叫佢返嚟唱老歌节目，用吓个脑啦，我点会咁话佢呀！系咪呀！系有人话佢，真系觉得佢好可怜、好阴功，但点解要拉我落水啫？我认同，但唔系我讲，我真系冇讲嘢喎…大家都知我为人㗎啦，我系大大声啫，系咪？我点会话人哋乜嘢，如果我唔系对你友善，都唔会一嚟就畀利是，如果唔系锡你，都唔会一路睇一路喊，啱唔啱呀？点解话我唔畀半碗饭佢食？关我鬼事咩，佢搵饭食，我仲要去捧佢场喎。大家都系歌星，见佢咁样喊，走先都唔得？唔系呀嘛…」

肥妈系咪申冤。

就算坐轮椅唱歌，对张伟文嚟讲都系一种精神寄托。

肥妈好容易落泪。

方俊力证两人唔多熟

对于头号嫌疑人肥妈言论，方俊直指张伟文同肥妈其实唔熟：「佢入咗老人院几年，都冇往来及联络，你话熟唔熟喇？」问到肥妈有冇派利是畀张伟文？他就说：「我走来走去做嘢好忙，当时就见唔到喇。」提到肥妈为张伟文悲从中来感触落泪，方俊觉得当日系第一场Show，张伟文还未适应，而肥妈睇咗半场就走咗：「我觉得可以有好多种正面方法去表达嘅，可以入后台支持伟文，同佢打气，我觉得咁样仲好。」另外，肥妈再重申同黑妹有畀利是张伟文，因为欣赏佢，先畀钱佢。