独家丨张伟文好感动一上台爆喊死过翻生首开Show全院满座

2022-07-29 01:00

今年2月，69岁「靓声王」张伟文(Donald)确诊新冠肺炎送院，幸好大步槛过！上周三(20号)晚，Donald于沙田大会堂为《友情有义演唱会》补场，亦是病愈后首个个唱。《头条娱乐》记者独家直击演出前后过程，Donald眼见成个Hall都系知音，感动爆喊咗3次，完场时仲被过百铁粉包围「集邮」，多得Fans支持令他回复精灵状态，开心扬言要唱到上红馆。采访：方骞平摄影：沈健程

张伟文见到知音好感动。

张伟文一上台见到座无虚席忍唔住喊。

张伟文留医期间发烧唔退兼半边肺花咗，幸好福大命大，不过，因为住院及康复期间长期「与世隔绝」导致失智症变得严重，试过喺老人院撼头埋墙，5月初做网上演唱会时全程面黑，多次扭计发脾气，要经理人方俊及助手呵完又𠱁。

因为之前长期「与世隔绝」，今年5月张伟文做网上演唱会时报心情好差。

期待有工开心情靓晒
事隔两个半月张伟文再开show，团队如临大敌，方俊照顾周到，演出前先递上罗汉果煲咸竹蜂开声茶及烧味作晚餐。当晚除咗换战衣时怪叫一两次外，张伟文好快变返四万咁口，他直认期待有工作，所以心情好返好多。问到系咪每次演出都视为最后一次？他反应好快一口否定：「唔系喎！有信心会唱落去。」对张伟文出心出力嘅方俊见状都松一口气，他说：「其实我有畀补脑supplement佢食，食完系叻咗好多，之前仲搵埋周启生、周小君及方丽盈帮佢练歌，佢𠵱家最开心系有得唱歌，有朋友带佢出嚟饮吓茶，希望佢keep住向好。」

当晚经理人方俊𠱁到张伟文系咁笑。

演出前，方俊先递上罗汉果煲咸竹蜂开声茶予张伟文开声。

方俊陪张伟文食烧味晚餐。

朋友托何婉盈送上大利是，张伟文开心到展示胜利手势。

周启生(后排左一)、周小君(第二排左一)、方丽盈(第二排右一)、方俊(第二排右二)演出前帮张伟文练歌。

肺部受损冇影响歌声
不过，当张伟文一出场唱出经典歌《每当变幻时》及《旧梦不须记》时就失手爆喊，一度泣不成声：「好多谢各位，好难得今时今日仲有你哋嚟捧场，本身有少少退缩，但有咁多人支持我，好感动，你哋好长情，只要有唱歌嘅一日我都继续唱落去。」台下观众大嗌：「加油呀！」又叫他多啲开演唱会嚟慰藉心灵。此刻张伟文竟搞笑驳嘴说：「我惊再肥就郁唔到喇！」无处不在嘅黄夏蕙突然现身观众席，还送上打气利是。而张伟文状态回勇，就算肺部曾受损都冇影响歌声，亦冇乜甩歌词，跟两个月前判若两人。

除司仪安德尊，嘉宾有姚炜、姜蓓莉及颜联武。

夏蕙BB跑上台前，派平安利是畀张伟文。

方俊全程喺「秘密基地」𥄫到实，不时透过咪嚟传送提示。

姚炜未有时间探青霞
张伟文完Show后仍然精神奕奕，仲好好唱口，被推住跟现场观众影合照嘅短短几分钟路上，不停轻松地哼歌，又做赛后检讨说：「我觉得自己做得ok，有满足感好好啦，𠵱家更有信心继续唱落去，唯一自己见到爱我嘅人会比较眼浅。」张伟文坚持唔会同观众分享死过翻生经历，因为唔想记住。
另外，表演嘉宾姚炜就话新生代歌星唱得好好，旧一代都冇得弹，所以冇打算复出唱歌，反而会有啲戏瘾，但传道使命更大。之前姚炜姐不在港，未有时间问候林青霞，她说：「佢喺香港另有居所嘅。」