古天后日志｜软银以阿里远期合约套现 变相令阿里保持区间上落

8月4日，多云，有狂风骤雨，雨势有时颇大。美股隔晚继续做好，虽然联储局鹰派代表指要提前加息，希望年底息口可以加至3.75%，不过美股被乐观情绪所笼罩，三大指数继续向上。道指升416点，标指升63点，纳指更升逾2%，劲升319点。

虽然已公布业绩嘅美企，大多表现未如理想，调低下季甚至全年预测，不过市场反而认为经济可能衰退嘅情况下，联储局或放慢加息步伐，甚至明年要开始掉头减息，只不过喺目前高通胀环境下，联储局基本上无乜可能放水，明年减息只系市场一厢情愿嘅想法。

至于欧洲方面问题更大，俄乌战争持续下，能源成本狂升已令唔少欧洲企业吃不消，通胀高企令经营本大增，加上过去两年疫情持续，令唔少企业债台高筑，唔少企业选择破产而非重组，可见欧洲唔少企业已抱放弃心态，对前景睇法悲观。咁嘅情况下欧洲都无法放水，只能无奈地收紧货币供应，试问美国情况未有比欧洲更差，基本上无任何条件放水。

阿里短期沽压解除

至于港股呢边，未有摆脱上落格局，台海局势紧张，早两日中港两地股市喺回调下，成交反而增加，反映跌市下沽压又增强。不过隔晚阿里(09988)上升，并带动其他中概股做好，主要系有报导指软银将透过预付远期合约（prepaid forward contracts）出售所持三分之一阿里股份，融资220亿美元。软银呢个举动，无疑系令市场松咗一口气，皆因软银咁大手货，暂时搵到融资出路，唔需要喺市场直接沽货，短期沽压解除，对阿里股价系正面嘅。

不过软银呢一个动作，等同将呢批货按咗畀银行，虽然名义上软银仍然持有呢批货，但实际上喺合约期内，银行一方系有权动用呢批货，喺市场操作。即系银行见阿里股价高出合约嘅接货价，银行就有机会喺市场沽出，并以较低价格买返，即系可以高沽低揸，变相就会令阿里股价保持咗喺一个区间之内。即系喺一段时间之内，阿里都会喺区间内上落，不妨参考返近日阿里嘅股价高低位，底部系接近86至90元，而顶部系105至110元，可以喺呢个范围之内炒上落。

古天后

(徐狄怡，证监会持牌人)