独家丨方绍聪自爆搵嘉宾曾遭嫌弃《野外》有望海外拍第三季

2022-05-09 08:00

方绍聪（奶仔）因拍《食脑丧B》而跟何广沛和郭子豪成为兄弟，原来合作前奶仔曾安排行山联谊增进感情，最搞笑是他写埋rundown。他坦承今次行山经验，奠定《野外步出》的初型，不过他自爆拍该节目曾遭嫌弃，但反而激励他节目要做得更好，他又透露节目已有望冲出香港拍第三季。

采访：杜淑霞摄影：沈健程

奶仔认为若冇10年拍剧经验，根本冇可能主持到《野外步出》。

奶仔拍《食脑》前，得知要跟何广沛和郭子豪演好兄弟，一度好鬼担心，「佢哋喺《跳跃生命线》已经好熟，担心同佢哋两个玩唔玩得埋，佢哋两个熟又会唔会一齐恰我呢？几庆幸佢哋都有呢个疑虑。」于是他专登安排行山之旅破冰，不过最搞笑他竟写埋rundown，要求大家跟住做，「讲明系ice breaking之旅，头一个钟介绍自己，第二钟讲吓啲无聊嘢，第三钟deep talk，第四个钟大家攰扮唔到嘢，啲真性情出晒嚟有机会嗌交，第五钟嗌完交．接唔接受到呢啲咁唔好睇嘅一面，接受到就成为朋友。」

奶仔未跟何广沛和郭子豪合作前，一度担心相处不来。

奶仔当日在群组贴出破冰之旅rundown，相当认真。

演戏经验没白费

连跟同事联谊都似足节目流程，难怪奶仔搞《野外步出》相当成功，他更开心透露节目有望冲出香港拍第三季，「前排C君大哥同我讲『奶仔再开《野外步出》第三季』，作为主持人正常再添食梗系𦧲饭应，但系我同佢讲『大佬搞唔掂，如果继续开喺香港冇嘢玩㗎啦』，佢就话『试吓同你倾吓外地』，我都好期待。」

奶仔笑指「食脑三子」除未认识时行过山外，之后未冇试过一齐行山。

由奶仔主持的《野外步出》先后拍了两季，嘉宾全是他圈中好友。

讲到该节目，相比奶仔在戏剧演出更令人深刻，但他觉得以往工作没有白费，「如果我冇嗰10年演戏经验，同啲嘉宾建立友情，平时演戏观察啲幕后点做，我系唔会做到呢个节目。」他更自爆当初筹拍时，搵嘉宾最困难，更曾被嫌弃「唔开心嘅嘢系有，当时有啲artist听到《野外步出》就问，『主持方绍聪系边个嚟？奶仔唔系做变态佬、茄哩啡嗰啲咩，我唔上佢节目，佢都唔知搞咩，唔会有人睇』，有啲再难听啲，系有啲嘉宾嚟咗节目后，开工时其他同事就话『你噚日拍完《野外步出》，唔好拍啦！又辛苦，点会有人睇』，我听完再发奋啲，要令啲冇参加嘅人后悔。」