独家丨何广沛寸江嘉敏超嘈：佢系TVB三大喇叭拍《食脑》首揸巴士扮失控

2022-04-19 07:00

何广沛、江嘉敏、郭子豪和方绍聪（奶仔）主演的剧集《食脑丧B》于2020年初已拍毕，等了两年终于昨晚（18日）首播。故事讲述何广沛饰演的「余阳光」，虽然由废青变成食脑的丧尸，但依然是个「巴胶」（巴士迷），今晚播出的一集可以见到佢揸巴士，更不时双手离軚危驾，又跟老友郭子豪和奶仔在巴士玩到癫。拍摄时江嘉敏投诉「食脑三子」好鬼嘈，反被广沛寸爆她是「TVB三大喇叭」之一，三子夹埋先有佢嘅威力，两人全程互窒超搞笑。

采访：杜杜

广沛双手可以离开軚盘举晒V，因全程有拖车拉住巴士。

「食脑三子」喺巴士度爬来爬去，似在巴士开party。

探班当日，身为「巴胶」的何广沛发梦以为自己由丧尸变返人，终于可以揸巴士，仲揸到离晒軚盘争啲炒车。广沛解释，「戏入面好失控咁揸巴士，手法比较夸张啲，希望观众睇得开心。」虽然首次揸巴士，但广沛强调相当安全，因公司好揼本拍，花6位出动巴士、拖车同摄影车，「巴士唔系人人都揸得，要学过认证过先得，所以公司都有安排拖车帮手，安心好多，咁大架车真系唔识揸。」

广沛玩到伸埋手出车窗同路人挥手，几癫！

这场戏花6位数拍好揼本，出动巴士、拖车同摄影车。

丧尸装化4个钟

广沛大部份时间都以丧尸造型现身，化妆时间特别长，「我第一次化都化咗3、4个钟，瞓咗无数嘅觉，瞓完又醒，但系都仲未化完，因为要喷白晒，跟住要加好多蓝色嘅青筋，眼底又要加啲红色眼线，又要戴color con，成件事都好认真，试过有日化咗4个钟，但系拍得15分钟，因为唔系好多镜头，所以希望出嚟效果OK啦！」当日江嘉敏亦要化丧尸妆，她投诉广沛因为于剧中成日发梦，致她要经常转造型，演唔同程度嘅丧尸，又称戴了有色隐形眼镜，睇唔到似扮盲，广沛见她躁躁哋即卖口乖𠱁她，「今日见到你试戴color con，即刻靓咗好多，好似混血儿咁样。」

化丧尸装，每次都好花时间。

戴了有色隐形眼镜，睇唔到嘢的嘉敏似扮盲。

爆「两大喇叭」芳名

提到拍摄「食脑三子」在巴士玩的场口时，嘉敏投诉他们超嘈，广沛心有不甘反驳：「我哋三个加埋先至超越你咋！即系你一个等如我哋三个。」嘉敏懒理：「我终于有机会话人嘈，而唔系俾人话我嘈！」听完广沛再还击，「嘈方面你系有认可性，同埋有个权威喺度，公司有『三大喇叭』，你系其中一个。」追问另外「两大喇叭」芳名，广沛只透露跟他做过拍档，嘉敏即抢住答，「你啲好朋友呀！」令记者误会是广沛绯闻女友朱晨丽，他急急澄清，「哈哈！朱朱喺呢方面绝对唔入流！」最终爆出是冯盈盈及刘佩玥后，广沛再寸嘉敏：「你有冇嘢需要平反吓，世人对你有冇误解？」嘉敏理直气壮解释：「其实我哋三个都好温柔、好斯文，世人对我哋误解实在太深嘞！哈哈！」广沛已经冇佢咁好气：「擘大眼讲大话就系呢啲！」戏里戏外，两人都系斗气冤家。