独家丨陶大宇唱《倒转地球》被恶搞 笑问保锜系咪想死

刘德华喺1996年推出嘅《倒转地球》，忽然间喺25年后翻hit，全因为有元祖级「师奶杀手」陶大宇加持，佢几乎每次登台都会唱呢首饮歌，甩bit嘅「魔音式」唱腔，加上「水泼式」独有台风，但无论点都系用坚定嘅眼神继续淡定唱，超级洗脑！

ERROR成员保锜噚日就拍咗条恶搞版《倒转地球》，完全模仿大宇嘅表情同唱腔，《头条娱乐》今日都有联络大宇，问番佢会唔会嬲？估唔到大宇超大方，唔嬲之馀，仲话好开心带咗咁多欢乐畀大家，佢以短讯回覆话：「我最近的确是倒转咗个地球，希望大家安全无事🤣🤣🤣！其实可以带比（畀）大家开心、欢乐，咁咪好罗！令人谈论、令人快乐，我可以做到，我觉得比（俾）佢哋更开心。」

问到会唔会怪责保锜扮自己？佢话：「其实保锜以前都扮过我…系我同ViuTV拍《辣伙头》个节目上面，可能有人觉得佢有少少似我，今次佢又扮我，我无嬲……好明显，除了有少少锺意我，就系想死！」然后再加咗超过十个哈哈笑emoji，咁仲有冇合作机会呢？大宇话：「如果有机会合作就要早少少通知🙏，我要揾Sunny帮我练吓舞。」

其实恶搞大宇版《倒转地球》，保锜绝非第一人，喺内地多个平台已经出现好多过「倒转地球陶大宇」版本，当中包括「公路版」、「篮球运动员版」、「大学校园版」等等，香港方面亦有人整咗张潜力图，话已投票畀大宇做「叱咤我最喜欢男歌手」，又有人留言：「畀佢入Alfred（许廷铿）嗰队啦」，非常搞笑。