许志安杜德伟撞样事件重演银白色头发唔一定系保锜

2021-10-15 08:15

人有相似，艺人撞样事件时有发生，最经典一次莫过于有网民将许志安认错成杜德伟，仲话：「条友好寸，叫佢杜生都唔睬人。」而C AllStar成员陈健安（On仔）又试过被人误认系曹永廉。

最近旅游达人、网络主持兼作家，总之就瓣数多多嘅前DJ云海，日前就喺社交网出咗个Post，话去睇《毒魔》IMAX特别场嘅时候劲惊喜，因为右手边坐咗几个ERROR同MIRROR 成员，睇完戏佢就硬着头皮问阿Dee影咗张合照，跟手就再数远少少嘅Lokman、Alton，但由于戏院好黑，大家又戴住口罩，佢就见到疑似保锜同肥仔嘅身影，仲偷拍咗一张相，但佢朋友就坚持话唔系，叫网民帮手认一认。

网民即发挥「柯南」嘅侦探头脑，都觉得唔系好对路，话肥仔好少戴眼镜，另有人话见到保锜当晚其实系同女友沙律一齐去睇，所以应该唔系佢哋两位。最后两位当事人出嚟认头，原来染咗白色头发嗰位唔系保锜，而系另一位歌手安俊豪，佢尴尴尬尬咁话：「HI EVERYONE!!令大家失望，白色头发系我嚟😂😂。」仲顺带hard sell新歌《失踪72小时》，好识借机会宣传。而「肥仔」其实系香港乐队神奇胶主音日新。