保锜@ERROR恶搞大宇版《倒转地球》 自爆重睇100次

现年58岁、有「师奶杀手」之称嘅陶大宇近年努力返大陆登台搵真银，商演活动当然要袋住几首饮歌，刘德华《倒转地球》同《爱我一万年》都系大宇嘅首本名曲。最近大宇献唱《倒》嘅登台短片喺中港两地疯传，佢以「魔音式」逐粒字唱腔，加上「水泼式」台风，非常洗脑，唔少人都剪咗短版无限Loop，成为网上热话。

「宇宙天团」ERROR成员之一保锜，一得闲就会拍片娱人娱己，继七师傅「闪电七连鞭」后，最近就恶搞陶大宇2.0，扮佢唱《倒转地球》放上IG，佢话自己重复睇咗条片100次，留言话：「最近大爱一首歌，不得不重唱一次，无论表情和语气，都表现得10分到位，所以决定表演给大家看，重复睇了100次的《倒转地球》。图1:独唱版 图2:合唱版」。

条片一啲都唔hea，揸咪唱仲有灯光特效，如同置身舞台一样。而保锜嘅模仿能力都好高，瞪大只眼都唔眨一下，表情、唱腔扮到足。小肥、J.Arie、张纹嘉等都有笑到喊emoji，但唔知当事人大宇见到会唔会嬲嬲猪呢？！