独家│吴婉芳为大仔新爱巢烦布置 婆媳有偈倾齐拣水晶灯

1986年港姐亚军，54岁的吴婉芳与已故富豪老公胡家骅育有两子一女，分别是26岁大仔胡智略（Casper）、二仔胡智同（Lynus）及女儿胡智晴（Helene）。日前大仔胡智略与霍英东的28岁孙女霍咏盈（Caroline）低调举行婚礼，冻龄港姐荣升奶奶。本报记者日前于铜锣湾见到Caroline陪奶奶去名店睇水晶灯，两婆媳全程有商有量，唔知系咪为大仔同新抱仔婚后嘅新居布置呢？采访：梁志明

2018年，吴婉芳的大仔胡智略被爆跟霍启刚堂妹Caroline谱出姊弟恋，日前两人低调举行豪门婚宴。Caroline都有在IG分享婚照多谢各界祝福，而新任奶奶更邀请契哥张学友、曾志伟、陈百祥等出席婚宴，学友仲唱埋《每天爱你多一些》贺新人，真系星光熠熠呀！

疑为大仔新居添装饰品

当日吴婉芳同Caroline现身名店Hermes，两人一入铺头就向店员查询不少水晶灯的资料，相信事前已经商量好要为新居添置水晶灯。该款水晶灯可坐枱又可坐地，总之通屋放都无问题。其间两人又请店员插电着灯睇吓靓唔靓，虽然全程都由吴婉芳同店员沟通居多，但佢不时都问吓Caroline意见，估计水晶灯是奶奶送畀大仔同Caroline的新居之用。

睇足45分钟都系唔买住

睇返产品介绍，吴婉芳睇中的水晶灯有几个款，话晒法国超级名牌出品，最平嗰款都要近2万蚊，如果拣限量版款式仲要多成万蚊。不过对好富贵嘅吴婉芳嚟讲绝对系碎银，睇足45分钟，两人都未决定好买边款灯。Caroline话晒都系英国皇家艺术学院建筑系硕士毕业，对美感有一定要求，相信盏灯衬唔衬屋企，新任奶奶应该好相信新抱仔嘅专业眼光。不过两人最后都冇买任何嘢，唔知系咪想问埋同样读艺术系嘅大仔意见先呢？

大约晚上7时许，吴婉芳同Caroline会合胡智略一齐行去附近食晚饭。沿途吴婉芳同Caroline仍然鸡啄唔断系咁倾，唔知系咪仲倾紧买唔买盏灯呀！大仔就默默跟喺后面，之后一齐入咗一座大厦，相信系一家人食晚饭。见吴婉芳同新抱仔行街非常好倾，相信前者一定好满意Caroline呢位新抱。