独家丨《造星IV》网民讨论度最强九囡囡 193胞妹爆Seed 叶咏诗女有信心入女团

2021-11-11 21:30

《全民造星IV》上周正式开播，96位参赛者以一对一PK形式争入60强。《头条》根据网民讨论度率先搵嚟9位囡囡倾吓偈,包括正负评都极多的193妹妹郭嘉盈、著名指挥家叶咏诗囡囡罗洛家、人气YouTuber刘展翘、KB旗下的郭东彩、39岁妈咪级谢裕铃、好多男Fans的葛绰瑶、好有自信的林暐翘、工作人员之选邱彦筒及中性打扮的锺君珩，有冇你哋心水先？撰文：杜杜、秦咏姿摄影：叶君海、沈健程

96号郭嘉盈，毅然放下银行的高薪厚职参赛，她坦言被唔算唱得跳得的哥哥启发，「可能有啲人好有才华，但冇乜观众缘都好难喺呢行发展，我哥哥唱歌或者跳舞都唔系好突出，但我知佢好努力去做、去学。」不过3妹承认哥哥高人气亦成她压力来源，「哥哥令到人哋更加留意我，呢个系好处，坏处系好多人拎我同佢比较。外界有啲声音『你系193个妹，唱歌跳舞都有人教』，事实真系冇，我跳舞都系出面搵老师学，Travis（欧国成）得闲先去练歌。」

Carmina背负名门压力

9号罗洛家(Carmina)因妈咪是著名指挥家叶咏诗受注目，26岁的她亦承认舆论是参赛前最大顾虑，「之前我系极度将呢样嘢放大，如果自己出嚟又冇去到嗰个level系难搞，屋企好支持话『每个人都行唔同嘅路，唔可以将人哋标准放落自己度』，妈咪话『如果你想试嘅话，用自己途径入行』」Carmina决心入女团，「好似MIRROR咁开发咗好多唔同嘅机会。」

Jackie组女版ERROR

拍YouTube频道《CapTV撷电视》、《啱Channel》及《试当真》而储下高人气的88号刘展翘（Jackie），自认不擅长跳唱，但拍片已到瓶颈位望参赛转型。对于观众睇惯她搞笑形象，她认为反而有好处，「有大啲反差，可能有惊喜畀到观众。而有少少知名度都算优胜之处，大家会比较留意我，唔好就系会多咗压力，可能会对我好大期望。」拍过剧的Jackie坦言，若未能以女团出道，亦想尝试以演员身份继续演艺事业，最恨与影帝梁朝伟演对手戏。如果组女版ERROR她一样OK，「我睇《花姐ERROR游》都有谂如果我拍会点？顶唔顶得顺啲游戏？都几激，都想试吓！」

东东被踩当搞笑

KB旗下艺人70号郭东彩听KB建议参赛，「佢同我讲『做番自己得㗎嘞！唔使畀自己太大压力，有咩需要同公司讲』」21岁的东东对跳唱零经验，预了出场后有负评，「我唱歌都几难听，将呢个谂到最坏就OK，都系爆粗话我。我系唔介意呢啲，我见到有啲话『屯门老泥MK妹』觉得好搞笑，唔hurt㗎！我只系会笑一笑，除非讲我屋企或者讲我啲friend，唔系都冇乜杀伤力。」热爱踩滑板的她，更希望参赛令外界对这项运动改观，「香港唔系好多人接受到滑板，会觉得好嘈好阻住，一见你纹身或者揸住块板就唔系好人。」

Ling感激老公撑参赛

21号谢裕铃（Ling）因已39岁兼有两子两女成话题，她笑言：「我咁嘅年龄，加上已婚有小朋友，咁样入嚟好搞事，但系ViuTV劲喎！都畀我玩。」Ling觉得自己思想年轻，加上长女快18岁，同年青人沟通合作都冇问题，但体力回复上确实不及一众小妹妹对手，幸好有老公支持，「我系要6点起身带小朋友返学，但比赛顶唔顺，佢都愿意配合我帮手，对我嚟讲好感动，庆幸身边最亲嘅人会畀一个空间我做自己想做嘅嘢。」作为妈妈级参赛者，Ling最想畀到正面鼓励其他人，「有啲妈咪朋友同我讲『你好勇敢，有小朋友追梦好欣赏你』，佢哋提番我鼓励到佢哋，或者畀啲希望佢哋，原来我呢个举动会畀到人一啲力量。」