洪嘉豪MC识于微时系时候了结 合作开骚预告宣布分手

洪嘉豪及MC张天赋作客TVB娱乐新闻台节目《StarTalk》，接受主播许文轩专访，二人大谈合作开骚感受。二人早在入行前已经认识，嘉豪说：「我哋系因为一个兰桂坊酒吧骚而认识，第一眼见到佢，觉得佢系一个死𡃁仔，因为咁多个乐手当中佢年纪最细，好似个细佬咁，好记得佢戴反Cap帽。」嘉豪亦大爆MC经常有借无还，说：「佢成日借我啲嘢唔还，有笔、化妆品等，所以我有时会问佢有啲咩嘢唔要送畀我，好似之前有条裤佢唔要畀咗我，我都有出镜着过，我咪当攞返佢啲便宜！」
MC则谓：「初初见到嘉豪嘅时候，第一印象唔系咁好，觉得有啲寸，后尾熟咗先发觉佢系咁样同人相处。依家识耐咗，佢仲会不停咁试我底线，成日讲一啲嘢嚟挑衅我，激到我差唔多想爆嘅时候，又氹番我，之后又继续烦住我！真系好讨厌！不过见佢弹钢琴同好认真造音乐嘅时候，都好吸引！」

谈到被网民打造成「赋豪CP」，二人一脸无奈，MC说：「我哋太Friend，所以平时喺公司同佢都几亲密，揽头揽颈系好正常，点知有一次我熊抱佢兼闻佢件衫，畀公司同事影到仲放咗上网就疯传，就搞成咁，无啦啦撮合我哋！」嘉豪笑说：「我哋识咗7年！（有冇7年滋痒？） 有！所以系要有个了结！我哋有讲过开骚时要宣布分手！」