独家丨王梓轩睇C君头求添食《演斗听》捧人构思来自曾志伟

2021-10-14 21:41

TVB节目《演斗听》将于11月13日播出最后一集，而当晚播映时间会提早至晚上10时，更请到20位音乐人及歌手如王菀之、吴业坤、赵慧珊、施匡翘等撑场。虽然节目一直被视为走偏锋，但口碑唔错，更被形容系有质素嘅节目，第一季完结，王梓轩坦言好不舍，期待将来再玩过。采访：方骞平摄影：叶君海服装：K-Swiss、Palladium

身兼节目主持人兼音乐总监嘅王梓轩提到节目的由来，因为几年前喺演艺人协会同曾志伟倾开，大家都想搞个带有刺激性嘅音乐节目，畀一班有才华嘅音乐人喺冇压力下发挥才华。

好恨将节目变成一个Show
为咗向曾志伟交代，王梓轩瞓晒身，每次花十几小时录影一集，仲会度埋节目内容。他笑说：「艺人面对舆论及花边新闻，最惨系冇渠道解释，透过音乐及唱歌，大家会听得入耳，识听嘅亦会搵到答案，所以我哋会喺嘉宾身上加入返啲好玩嘅素材，好似郑俊弘讲返创作《火车未到站》系因为忘记拉拉链；《刀削面》胡鸿钧又畀郑嘉嘉追问有冇整过容。」问到可有想过开第二辑或将节目变成一个show？梓轩恨到出口说：「我哋成班都系玩开演唱会嘅梗系恨开Show啦！而农夫嘅C君(郑诗君)好锺意个节目，成日话撑但又冇时间上嚟做嘉宾，𠵱家佢『升呢』J2台创意总监，我就靠呢位高层撑我开新一辑节目啦！」