独家丨张振朗眼神冧爆杨偲泳 唔拖唔揽8号波一落即低调拍拖

曾有TVB地狱黑仔王之称的张振朗(Owen)，终于脱离呢个灰爆称号，年初更攞埋「最受欢迎电视男角色」向视帝进发，TVB男一嚟讲，34岁相当后生绝对前途无限，有排玩所以恋情要低调，宁畀你知，唔畀你见咁多。本周日(10月10日)，刚落8号风球，张振朗同拍拖快三年的27岁女友杨偲泳(Renci)去IFC买iPad，全程冇拖冇揽，戴住口罩嘅两人靠眼神传情，好甜呀喂。采访:张咏森

张振朗目前正跟高海宁拍紧TVB剧《童时爱上你》，饰演化妆师的男方被女方嫌弃化妆技巧麻麻，张振朗笑称冇搵女友杨偲泳练习，因为无谓害人啦。提吓女友都仲OK，但情侣档搵钱就咪搞。

女友陪买iPad
今年7月，张振朗同女友出席洪永城婚礼，二人认爱后首度拍拖现身公开场合。张振朗受访时异常紧张，口窒又流晒汗，Owen仔表示估唔到现场有咁多传媒，同女友嘅恋情一向低调，应该唔会有第二次公开亮相，又唔好讲到咁绝，结婚咪会有第二次罗。本周日下昼4点落咗8号风球，低调情侣现身中环ifc，全身老牛嘅Owen同着住紫色露背连身裙的女友去咗Apple Store，睇两人肢体动作，明显系女方陪男方买iPad同iPad套，因为一早有心水，低调情侣连拣连买只用咗15分钟，试玩途中，低调情侣贴到实，Owen仔仲会用好温柔嘅眼神同女友讲嘢，估计Renci应该好鬼冧。

各有私人时间
买完高科技产品，两人再一齐去买咖啡，买完女方坐低饮，男方就拎住iPad去接待处吸停车场印仔，女方饮啡半个钟就行去皇后大道中Zara会合女友人。Owen仔曾在访问中大赞女友，「佢系好好嘅女仔。」仲自认巨蟹座家庭观念重，一定会结婚，仲话「我都几锺意帮佢吹头㗎，我系几锡女朋友嘅，男朋友嚟讲，都有80几90分㗎。」亲眼见证张振朗用眼神冧女，恭喜你呀Renci。